रुससँग भारतले के गर्छ मलाई वास्ता छैन : ट्रम्प

वासिङ्टन डीसी । अमेरिकी राष्ट्रपति डोनाल्ड ट्रम्पले बिहीबार रुससँग भारतको सम्बन्धबारे प्रतिक्रिया दिएका छन् । ‘भारतले रुससँग के गर्छ भन्ने मलाई कुनै मतलब छैन’ ट्रम्पले भनेका छन् । यसअघि ट्रम्पले बुधबार अगस्ट १ देखि भारतबाट अमेरिका आउने सबै सामानहरूमा २५ प्रतिशत कर लगाइने घोषणा गरेका थिए । साथै उनले रुसबाट हतियार र तेल खरिद गर्दा भारतविरुद्ध थप आयात शुल्क लगाउने बारेमा पनि कुरा गरेका थिए । 

‘भारतले रुससँग के गर्छ मलाई मतलब छैन । यदि तिनीहरू बर्बाद हुँदै गइरहेको आफ्नो अर्थतन्त्रलाई एकसाथ डुबाउन चाहन्छन् भने डुबाउन मलाई कुनै मतलब छैन’ ट्रम्पले बिहीबार सामाजिक सञ्जाल प्लेटफर्म टुथ सोसलमा लेखेका थिए ।

पोस्टमा उनले पूर्वरुसी राष्ट्रपति मेदवेदेवलाई ट्रम्पले असफल राष्ट्रपतिको संज्ञा दिए । मेदवेदेवले अझै पनि आफूलाई राष्ट्रपति नै ठान्ने भन्दै ट्रम्पले ‘आफ्ना शब्दमा ध्यान देऊ’ भनेर कसैले उनलाई भन्नुपर्ने पनि बताए । उनले निकै खतरनाक जमिनमाथि कदम राखिरहेको चेतावनी पनि ट्रम्पले दिए ।