म हारेको छैन, यो मैले जितेको हो : दुर्गा प्रसाईँ

काठमाडौँ । सर्वोच्च अदालतको आदेशपछि मेडिकल व्यवसायी दुर्गा प्रसाईँ रिहा भएका छन् । उनी संगठित अपराध र आपराधिक लाभ लिन नहुने कसुर गरेको अभियोगमा केन्द्रीय प्रहरी अनुसन्धान ब्युरोमा थिए । उनलाई छोरा नीराजनको जिम्मा लगाएर छोडिएको सीआईबीले जनाएको छ । 

सीआईबीका अनुसार उनलाई आइतबार हाजिर जमानीका लागि बोलाइएको छ । त्यसपछि मात्रै उनलाई कति–कति दिनमा हाजिर गर्न आउनु पर्ने भन्नेबारे निर्णय हुनेछ बताए ।

रिहा भएपछि प्रसाईँ अदालतबाट आफूले न्याय पाएको बताएका छन् । उनले आफू सर्वहारा वर्गको बोली भएको पनि बताए । उनले तस्करहरूसँगको लडाइँ जारी रहने पनि बताए । ‘म हारेको छैन है । यो हारेको होइन नि फेरि । यो मैले जितेको हो, यो तपाईँहरूको जित हो’, गाडीमा सवार प्रसाईँले समर्थकहरूलाई भने ।