चीनमाथि बेलायतले लगायो साइबर हमलाको आरोप

लन्डन । बेलायत सरकारले चीनमाथि सांसद र निर्वाचन आयोगविरुद्ध ‘दुर्भावपूर्ण’  साइबर अभियान चलाएको आरोप लगाएको छ । बेलायतले साइबर आक्रमण गरेको आरोपमा दुई व्यक्ति र एउटा कम्पनीमाथि प्रतिबन्ध लगाएको छ ।

चीन आफ्नो आलोचना गर्ने बेलायती सांसदहरू र ४ करोड मतदाताहरूको डेटा हासिल गर्ने प्रयासमा भएको बेलायती उपप्रधानमन्त्री ओलिभर डाउडेनले भनेका छन् । बेलायतस्थित चिनियाँ दूतावासले भने यी आरोपहरूलाई निराधार बताएको छ ।

प्रतिबन्ध लगाइएका दुई चिनियाँ नागरिकहरू झाओ गुआन्जाउ र नि गुओबिन भएको बताइएको छ । प्रतिबन्धमा पर्ने कम्पनी चाहिँ वुहान जियोरिजी विज्ञान र प्रविधि कम्पनी लिमिटेड हो ।यसैबिच अमेरिकाले पनि साइबर जासुस गर्ने चिनियाँ कम्पनी एड्भान्स्ड पर्सिस्टेन्ट थ्रेट ३१ (एपीटी ३१)माथि प्रतिबन्ध लगाएको छ ।

अमेरिकी विदेश मन्त्रालयका अनुसार अमेरिका सरकारले चीनसँग सम्बन्धित एपीटी३१ विरुद्ध कारबाही गरिरहेको छ । यो कम्पनीको जालमा अमेरिकी अधिकारीहरू, राजनेतासहित कयौँ मानिस फसेको बताइएको छ ।