भ्रष्टाचारविरुद्धको अभियान अगाडि बढाउँछौँ : उपप्रधानमन्त्री श्रेष्ठ

काठमाडौँ । उपप्रधानमन्त्री एवम् गृहमन्त्री नारायणकाजी श्रेष्ठले भ्रष्टाचारविरुद्ध सुशासनको अभियान सरकारले जारी राख्ने बताएका छन् । भ्रष्टाचार, अपराधीकरणलाई प्रभावकारी नियन्त्रण गरी दण्डहीनताको अन्त्य गर्नु सरकारको मिसन भएको जिकिर गर्दै अभियान जारी राख्ने बताएका हुन् । 

‘सरकारमा पनि रहिराख्ने अनि तैं चुप मैँ चुपको धन्दा हामी चलाउँदैनौँ । सुशासन, समृद्धि र सामाजिक न्यायलाई सरकारले मूल मन्त्र बनाएको छ । यो  अभियान जारी रहन्छ,पूर्णविराम लाग्दैन’, सोमबार काठमाडौँमा आयोजित एक कार्यक्रममा उनले भने- ‘हामी भ्रष्टाचारविरुद्धको  अभियान अगाडि बढाउँछौँ । अपराधीकरणको प्रभावकारी नियन्त्रण गरी दण्डहीनताको अन्त्य गर्छौँ ।’

कर्मचारीले सुराकीका नाममा र मन्त्रीले  अपारदर्शी रूपले  खर्च गर्न पाउने पञ्चायतकालीन प्रावधान खारेज गरेर सुशासनको अभियान अगाडि बढाएको श्रेष्ठले बताए । नक्कली शरणार्थी प्रकरण, ललिता निवास, ६१ किलो सुन छानबिनसहित मुद्दा दायर भएको, सामन्तवादको अवशेषका रूपमा रहेको मिटर ब्याजलाई नियन्त्रण र कारबाही गर्न सरकारले नयाँ ऐन बनाएको उनले बताए ।