प्रदेश र सांसदको संख्या घटाउनुपर्छ : चन्द्र भण्डारी

काठमाडौँ । नेपाली काँग्रेसका सांसद चन्द्र भण्डारीले प्रदेश र मन्त्रीहरूको संख्या घटाउन अभियान चलाउन ढिलाइ भइसकेको बताएका छन्। विद्यालय शिक्षा विधेयकमाथि अनेरास्ववियूको अन्तरक्रिया कार्यक्रममा बोल्दै कर्मचारी र शिक्षकलाई तलब खुवाउन नसक्ने अवस्थामा सांसदहरूको संख्या घटाउनुपर्ने बताए।

उनले भने, ‘यतिधेरै प्रदेश बनाएका छौँ। यति धेरै मन्त्री बनाएका छौँ। कर्मचारी र शिक्षकहरूलाई तलब खुवाउने पैसा छैन। अब हामीले प्रदेशको संख्या घटाऔँ, सांसदको संख्या घटाऔँ भनेर अभियान चलाउनुपर्छ समानुपातिकमा विज्ञहरूलाई नै माथिल्लो सदनमा लैजाऔँ त्यहीबाट मन्त्री बनाऔँ भनेर अभियान चलाउन आवश्यक छ।’