माओवादीको विद्यार्थी संगठन राष्ट्रिय सम्मेलन आयोजक समितिमा रुपान्तरण हुने

काठमाडौं । नेकपा माओवादी केन्द्रको विद्यार्थी संगठन अनेरास्ववियु क्रान्तिकारी राष्ट्रिय सम्मेलन आयोजक समितिमा रुपान्तरण हुने भएको छ ।   विद्यार्थी मोर्चा भित्र रहेको समस्या समाधानका लागि भएको सहमतिअनुसार अब विद्यमान केन्द्रीय समितिलाई पदाधिकारी कायम राखी २३ औं राष्ट्रिय सम्मेलन आयोजक समितिमा रुपान्तरण गर्ने निर्णय भएको हो । सोहीअनुसार यथाशिघ्र विधान सम्मेलन र राष्ट्रिय सम्मेलनको मिति तय गर्ने माओवादी केन्द्रले जनाएको छ । 

माओवादीका अनुसार आयोजक समितिमा पदाधिकारी विस्तार गर्ने र विस्तार गर्दा २२ औं राष्ट्रिय सम्मेलन आयोजक समितिमा रहेका र हाल केन्द्रीय समितिमा क्रियाशिल सदस्यहरुको एउटा तहलाई मापदण्ड मानी स्वतः बढुवा गर्ने निर्णय भएको छ ।  अध्यक्ष, उपाध्यक्षहरु र महासचिव रहेको कार्यालय टिम बनाउने निर्णयसहितको जानकारी मातहतका कमिटीमा सुर्कलरमार्फत दिइएको छ । 

आयोजक समिति सदस्य केही विस्तार गर्ने र यसो गर्दा २२ औं राष्ट्रिय सम्मेलनका सिनियर प्रतिनिधिहरु मध्यबाट समान स्तरको आधारमा छनौट गर्ने सहमति भएको छ ।  मातहतका कमिटीमा रहेका असमझदारी हटाउने र यसको लागि गृहकार्य गर्न एउटा कार्यदल बनाउने निर्णय पनि भएको छ ।