कोशी प्रदेश नामकरण विवाद कांग्रेस बैठकमा प्रवेश

काठमाडौँ । नेपाली कांग्रेस केन्द्रीय कार्यसमिति बैठकमा कोशी प्रदेशको नामकरण विवादको विषय उठेको छ । मंगलबारदेखि जारी बैठकमा आज सदस्य केशरकुमार बुढाथोकीले कोशी प्रदेश नामकरण विवादको विषय उठाएका हुन् ।

‘प्रदेश १ को नामकरण विवाद छ । यहाँ पार्टी बोलेन । एक नम्बर प्रदेशको हाम्रो उपस्थिति छैन । हाम्रो उपस्थिति भए यो विषयमा पार्टी बोल्थ्यो आज ?,’ उनको प्रश्न छ ।

एक नम्बर प्रदेशको नाम एमाले अध्यक्ष केपी ओलीले कोशी प्रदेश राखेको उनको भनाइ थियो । ‘हामीले लहलहैमा कोशी प्रदेश राख्यौं । कार्यकर्ताले त्यो कुरालाई स्वीकार गरेका छैन । कोही नेता गाउँ जान सकेको छैन । हामी यस विषयमा के गछौंँ ?,’ बुढाथोकीले भने । 

कोशी प्रदेशको किराँत समुदायसँग नामकरणबारे पार्टी नेतृत्वले सहमति खोज्नुपर्ने उनको भनाइ छ ।  ‘त्यहाँ किराँत जागेका छन् । उहाँहरुले धेरै केही मागेका छैनन् । आफ्नो पहिचानसहितको प्रदेशको नाम मागिरहेका छन् । कांग्रेस चुप्प छ,’ उनले भने, ‘त्यहाँ आन्दोलनकारीसँग बेलैमा नेतृत्वले सम्झारी गरेन भने नेपाली कांग्रेसले चुनावमा नलडोस् । काम पनि छैन । भोट पनि पाउँदैन । यसलाई गम्भीर रुपमा दिन मेरो अनुरोध छ ।’ 

कांग्रेसका सहिदलाई नेताहरुले नसम्झेको बुढाथोकीको गुनासो छ । ‘इलामको माइपोखरीको जंगलमा खाल्डो खन्न लगाएर जिउँदै गाडिएको तुलाबहादुर राई, खड्गबहादुर राई, तेजबहादुर राई, बलबहादुर गुरुङ, जितबहादुर राई, डाकमान राई र लालबहादुर राईको नाम महामन्त्रीको प्रतिवेदनमा छैन । महामन्त्री विश्वप्रकाशजी त सम्झिनुहुन्थ्यो । खै त तपाईको प्रतिवेदनमा उहाँहरुबारे ?,’ उनले प्रश्न गरे ।

महामन्त्री शर्मालाई प्रतिवेदनमा उनीहरुको नाममा पनि कार्यक्रम राख्न बुढाथाकीले बताए । यस्तै उनले बजेटमाथि सभामुखले मतदान गराउन नपाउने भन्दै बैठकले यसलाई छलफलको विषय बनाउनुपर्ने बताए ।