खिमा रिजाल
मुलुक यति बेला उपनिर्वाचनको मैदानमा होमिएको छ । प्रतिस्पर्धीहरू मैदानमा ज्यान फालेर लागेका छन् । ज्यान मात्रै फालेका छैनन् एक आपसको गाली गलौचमा प्रतिस्पर्धा नै गरेका छन्, मानौँ गाली नगर्ने हो भने एक तह पछाडि परिन्छ । यसरी यी र यस्ता हरकत भइरहँदा सदाझैँ यस पटकको चुनावमा पनि प्रधानमन्त्री पुत्री एवम् भरतपुर महानगरपालिकाकी मेयर रेणु दाहालमाथि फेरि अर्को झटारो फालिएको छ । पटक पटकको झटारोले पङ्क्तिकारको मनमा उब्जिएका भावना, तिक्तता, उकुसमुकुसहरू उजागर गर्ने जमर्को गरिएको छ ।
उपनिर्वाचनको सरमगरमसँगै मैदानमा प्रतिस्पर्धीहरू उत्रिइरहँदा तनहुँ, चितवन र बारामा नेकपा.माओवादी केन्द्रको उम्मेदवार मैदानमा छैनन् । गठबन्धनको पक्षधर भएको नाताले रेणु दाहालले पनि आफ्नो पार्टीले ऐक्यबद्धता जनाएका उम्मेदवारलाई मत माग्दै चुनावी सभालाई सम्बोधन गरिन् । तर उनले गरेको सम्बोधनको विषयलाई लिएर चुनावी मैदानमा भने मेयर रेणु दाहालमाथि सुन्नै नसकिने गाली बर्सिए ।
को हुन रेनु दाहाल ?
सबैबाट नछिपेको विषय प्रधानमन्त्री पुष्पकमल दाहाल(प्रचण्ड)को दोस्रो सन्तान अर्थात् पुत्री हुन् रेनु दाहाल । त्यसो त उनी २०३३ सालमा भरतपुर महानगरपालिकामा जन्मी हुर्किएकी हुन् । उनको बाल्यकाल चितवनमै बित्यो । प्रधानमन्त्री पुत्री भएकोले प्रधानमन्त्रीको राजनीतिक गतिविधिबाट उनी अछुतो बनिनन् । नेपालका उच्च तहका प्राय सबै वामपन्थी नेताहरूको छत्रछायामा नै उनको बाल्यकाल बित्यो भन्दा अत्युक्ति नहोला । सानैदेखि कम्युनिस्ट आन्दोलनको छापले उनी असङ्गठित रूपमा रहन सकिनन् । त्यसैले उनले २०५० सालमा नेतृ हिसिला यमिको हातबाट पार्टी सदस्यता ग्रहण गरिन् । जनयुद्धको थालनीसँगै सुरक्षाको कारण उनी र उनको परिवार चितवनबाट नेपाल र भारतका विभिन्न ठाउँमा स्थानान्तरण भए । उनले प्रधानमन्त्री पुष्पकमल दाहालले जनयुद्धको नेतृत्व गरिसकेपछि पढाइलाई समेत निरन्तरता दिन सकिनन् ।
यसै क्रममा उनले २०५३ सालमा प्रवासका नेता डीबी पाठकका छोरा अर्जुन पाठकसँग पार्टीका शीर्ष नेताहरूको सहभागितामा जनवादी विवाह गरिन् । विवाह पश्चात् उनी प्रवासमै रहेर जनयुद्धलाई सहयोग गरिन् । काम गर्दै जाने सन्दर्भमा महिलाको इकाई सदस्यमा सङ्गठित हुँदै २०५९ सालमा अखिल भारत नेपाली महिला संघको अध्यक्षको भूमिका निर्वाह गरिन् । विद्रोहीहरूको ढाडमा टेकेर टाउकोमा हान्ने योजना अन्तर्गत उनी २०६१ सालमा रोल्पाको सह इन्चार्जको भूमिका निर्वाह गर्न पुगिन् । यसै बिचमा उनलाई स्वास्थ्यले धोका दिन पुग्यो र २०६३ सालमा उनी उपचारको क्रममा काठमाडौँ पुगिन् । २०६३ सालमा उनले फेरि स्वास्थ्य र पार्टीको कामलाई निरन्तरता दिदै काठमाडौँ जिल्लाको सह सेक्रेटरीको भूमिका निर्वाह गरिन् ।
उनी दोस्रो संविधान सभाको चुनावमा काठमाडौँ क्षेत्र नं १० बाट प्रकाशमान सिंहको प्रतिद्वन्द्वी भई चुनावी मैदानमा होमिएकी थिइन् र दोस्रो स्थान हासिल गर्न सफल बनेकी थिइन् ।
यो वा त्यो रूपमा कहिले प्रवास त कहिले स्वदेशमा रहेर, आवश्यकता बमोजिम अग्र मोर्चा वा पृष्ठ मोर्चाको नेतृत्व गरिन् । द्वन्द्वको उद्गम मानिने रोल्पाको समेत नेतृत्व सम्हालेकी रेणु दाहाल हाल माओवादी केन्द्रकी केन्द्रीय सदस्य तथा भरतपुर महानगरपालिकाकी मेयर समेत रहेकी छन् । त्यसो त उनको यो महानगरपालिका प्रमुख भने दोस्रो कार्यकाल हो । ३ दशक लामो राजनीतिक जीवन गुजार्दै उनी यो अवस्थामा पुगेकी हुन् । उनी एकाएक मेयरको टीका थापेकी होइनन् । शान्ति प्रक्रियामा सङ्गठित बनेका कैयौँ पात्र पालिकाका प्रमुख, उपप्रमुख, सांसद, मन्त्री बनिसकेको यो पङ्क्तिकारको आँखाबाट पनि छिपेको छैन । मेयर रेणु दाहालको राजनीतिक लगानी कम देखिँदैन । उनी ३ दशक यता निरन्तर राजनीतिमा सक्रिय छन् । ३ दशक लामो राजनीतिक यात्रा तय गर्दा प्राप्त भएको पदीय जिम्मेवारी प्रधानमन्त्री पुत्री भएबापत दयामायाले प्रदान गरिएको भने देखिँदैन । यो त केवल विरोधको लागि विरोध मात्रै भएको भन्न सकिन्छ ।
उपनिर्वाचनमा ट्रोल ...
प्रत्येक पटक झैँ यस पटकको उपनिर्वाचनमा विगतमा झैँ उनीमाथि प्रहार गरियो । मानौँ उनी निर्जीव बस्तु हुन् । खासगरि गठबन्धन इतरका दलका प्रत्येक वक्ता प्रतिनिधिले मतपत्र चपाएकी, मतपत्र च्यातेर मेयर बनेकी, भारतीय नागरिक, राजकुमारी, शक्तिको दुरुपयोग गरेकी आदी आदी । अघिल्लो निर्वाचनमा केही उदण्ड व्यक्तिहरूले मतपत्र च्याते । ती व्यक्तिहरूलाई कानुनी कारबाही गरियो- निर्वाचन आयोगले पुन निर्वाचन गरायो । रेणु दाहालले मेयर पदमा विजय हासिल गरिन र मेयर बनिन । तर मतपत्र च्यातेको दोष अहिलेसम्म पनि उनलाई प्रहार गरेको गर्यैछ । त्यति मात्रै होइन उनी दोस्रो निर्वाचनमा भारी मतान्तरले पुन मेयर पदमा विजयी बनिन र अहिले देशकै ६ वटा महानगर पालिकामा सबैभन्दा सर्वोत्कृष्ट विकास निर्माण र कार्यसम्पादन गर्ने महानगरपालिकामा परेकी छन् ।
प्रधानमन्त्री पुत्री भएको कारण पक्कै विकास निर्माणमा आर्थिक पहुँच अन्य मेयरलाइ भन्दा सहज भयो होला । तर इच्छाशक्ति विना यो सम्भव हुने थिएन । अहिले चितवनका बासिन्दाले विकास निर्माणमा प्रत्यक्ष महसुस गरेका छन् । महानगरपालिकामा विकास गर्नु उनको कमजोरी हो । महानगरपालिकामा न्यून बेरुजु आउनु उनको कमजोरी हो । सुकुम्वासीहरूले जग्गाधनी पुर्जा पाउनु उनको कमजोरी हो । पक्कै होइन होला । ३ दशक लामो राजनीतिक यात्रा गरिसकेपछि प्रतिस्पर्धामा उत्रनु अपराध हो । सरसरती हेर्दा उनको यहाँसम्मको यात्रा अथक मेहनत नै मुख्य विषय हो भन्ने देखिन्छ ।
दोहोरो नागरिकताको दोष
हामी सबैलाई थाहा छ खुल्ला सिमाना, धार्मिक तथा सांस्कृतिक समानताको कारण भारतसँग हाम्रो सबै खाले सम्बन्ध स्थापित छ । भारतसँग हाम्रो बिहाबारी, लेनदेनको सम्बन्ध छ । भारतका चेलीबेटी नेपालमा बुहारी र नेपालका छोरी भारतमा बुहारी बन्ने प्रचलन परम्पराबाट नै थियो । भारतका मान्छेहरू नेपालमा कामको खोजीमा आउने र नेपालका मान्छेहरू रोजीरोटीको निम्ति भारत जान्छन् । त्यस्तै जनयुद्धको कारण देश सङ्कटकालीन अवस्थामा प्रवेश गरेसँगै कैयौँ नेता कार्यकर्ता नेपाल र भारतको भूमिमा रहेर जनयुद्धको नेतृत्व गरेका थिए । गुल्मीका डिवि पाठक पनि राजनीतिक कामको सन्दर्भमा भारत पसेका थिए । जनयुद्धको थालनीसँगै उनका छोरा अर्जुन पाठकसँग रेणु दाहालले २०५३ सालमा विवाह गरिन् । यसरी हेर्दा उनका परिवार बंसजको आधारमा नेपालको नागरिकता प्राप्त गर्ने नेपाली नागरिक हुन् ।
नेपाली नागरिककी बुहारी, श्रीमती कसरी भारतीय नागरिक बनिन् । रेणु दाहाल उपनिर्वाचनको उम्मेदवार पनि होइनन् न त उनी पहिलो वरियताकी नेतृ नै हुन् । चुनाव नजिकिएसँगै गठबन्धन इतरका शक्ति फेरि उनीमाथि खनिए । सामाजिक सञ्जाल रेणु दाहाल विरुद्ध रगिंयो । अहिले सामाजिक सञ्जाल नाङ्गो आँखाले हेर्न मिल्ने खालको छैन । प्रधानमन्त्री पुत्र प्रकाश दाहालको मृत्यु भएको पनि केही वर्ष बितिसकेको छ । प्रकाश दाहालको कमजोरी देखाएर रेणु दाहाललाई तथानाम गाली गलौच गरिएको छ । मानौँ उनको सबै कमजोरीको जिम्मा रेनु दाहालले लिनु पर्नेछ ।
अन्त्यमा जनयुद्धको नेतृत्व प्रधानमन्त्री पुष्पकमल दाहालले गरे । जनयुद्धमा दोहोरो पक्षबाट हजारौँ व्यक्तिको मृत्यु हुन पुग्यो अहिले पनि कैयौँ मान्छे बेपत्ता छन्, घाइते अपाङ्ग छन् । प्रधानमन्त्रीलाई आलोचना र विरोध गरिरहँदा रेणु दाहाल माथि पनि प्रहार गरिन्छ । कहिले चरित्रमाथि औला उठाइन्छ त कहिले राजनीतिक हमला गरिन्छ । आफूलाई बौद्धिक हुँ भन्नेले समेत उनीमाथि राजनीतिक , चारित्रिक र सुन्नै नसकिने टिप्पणी गरिएको अवस्था छ । सधैँ सधैँ यसरी खेदिइरहनु पर्ने प्रधानमन्त्रीको सन्तान भएर हो भने यो सरासर गलत हो ।
हरेक मानिसको स्वतन्त्रता पूर्वक जिउने अधिकार हुन्छ । महिला भएकै कारणले पटक पटकको हिंसा गरिएको र अनेक सत्तोसराप गरिएको हो भने उनी माथिको हिंसाको आकलन गर्नै नसकिने खालको छ । यस्तो ट्रोलको सिकार बनाइ रहँदा दल भन्दा माथि उठेर महिलाको पक्षमा आवाज उठाउने जो कोहीले पनि आवाज उठाउनु पर्ने होइन र ? कामको इर्श्याले गालीगलौज गरिएको हो भने अन्य महानगरपालिकाका प्रतिनिधिले उनको महानगरपालिकाबाट विकासको मोडेल सिक्दा केही फरक पर्ला र ।
यदि विधिको शासन कायम नै रहेको अवस्था हो भने यसरी सधैँ यउटै मान्छेमाथि प्रहार गरिरहँदा कानुन आकर्षित हुनु पर्ने होइन र ? भनिन्छ जसरी एउटा हार्ड डिस्कमा निश्चित क्षमता हुन्छ त्यस्तै मानिसको ब्रेनमा पनि प्रतिरोध गर्ने निश्चित क्षमता हुन्छ । के सधैँको प्रहार र ट्रोल बनाएर मानसिक रूपमा अशक्त बनाउन खोजिएको हो ? एक त राजनीतिमा महिलाको सहभागिता र नेतृत्व निमार्णको निरन्तरता तथा नीति निमार्णको तहसम्म पुग्न कठिन छ । त्यस्तै बल्लबल्ल नेतृत्व गर्ने तहमा पुग्न कोसिस गरेका महिलामाथि यसरी जाइलाग्दा उनमा पर्ने मानसिक असरको जिम्मा कसले लिने ? अथवा यो ट्रोलको सिकार कहिलेसम्म बनाइ रहने ? हामी सबै जिम्मेवार नागरिकले एक पटक म म भनेर सोच्ने कि ?
प्रतिक्रिया दिनुहोस
सफल खबर संवाददाता
शनिबार, ०९ बैशाख २०८०, १७ : १८
लेखकबाट थप
सम्बन्धित समाचारहरु
भरतपुर भ्रमण वर्ष : राप्ती नदीमा छाडिए २० वटा घडियाल गोही
सर्वसाधारणको लागि खुला हुँदै दियालो बंगला, सञ्चालनको जिम्मा भरतपुर महानगरलाई
भरतपुर भ्रमण वर्ष सफल पार्न प्रमुख दाहालको आग्रह
मेयर रेनु दाहाल लन्डनमा ‘अन्तर्राष्ट्रिय मेयर अवार्ड’ थाप्दै
भरतपुर महानगर प्रमुख दाहाललाई बेलायत जान मन्त्रिपरिषद्ले दियो अनुमति
आगामी कार्यभार भरतपुरमा उद्यमशिलताको विकास : प्रमुख दाहाल