सांसद निशा डाँगीको प्रश्न : प्रतिनिधिसभा नियमावली कति दिनभित्र पास हुन्छ ?

काठमाडौं । राष्ट्रिय स्वतन्त्र पार्टीकी सांसद निशा डाँगीले प्रतिनिधिसभा नियमावली बन्नमा समय लागेको भन्दै सिंगो सदनको ध्यानाकर्षण गरेकी छन् ।आइतबार प्रतिनिधिसभाको बैठकमा बोल्दै उनले भनिन्, ‘कति दिनभित्र प्रतिनिधिसभा नियमावली पास हुनेछ ?’

गत मंसिर ४ गते सम्पन्न आम चुनावबाट चुनिएर आएका प्रतिनिधिसभा सदस्यहरुले पुस ७ गते पद तथा गोपनीयताको शपथ ग्रहण गरेका थिए । १० माघमा प्रतिनिधिसभा नियमावली मस्यौदा समिति बनेको थियो । ११ फागुनमा मस्यौदा समितिले नियमावली मस्यौदा समितिले आफ्नो प्रतिवेदन बुझाएको थियो । चैत ६ गते प्रतिनिधिसभाको बैठकमा पेश भएको नियमावली मस्यौदा प्रतिवेदन थप अगाडि बढेको छैन ।

लामो समयसम्म प्रतिनिधिसभा नियमावली सदनबाट पास हुन नसकेको भन्दै सांसद डाँगीले प्रश्न गरेकी हुन् । सांसद डाँगीले संसदीय समितिहरु गठन भएकोप्रति समेत सदनको ध्यानाकर्षण गराएकी छन् ।

‘कति दिनभित्र संसदीय समितिहरू बन्नेछन्, र कुन दिनबाट सदन संविधानले परिकल्पना गरे अनुसार आफ्नो काम कारबाहीमा गतिशील भएर अघि बढ्छ ? यी प्रश्न जनताले मलाई गरिरहन्छन तर म निरूत्तर छु’ उनले भनिन्, ‘त्यसैले यी प्रश्नहरुको जवाफ सभामुखमार्फत सुन्न चाहन्छु ।’