पहिरो खसेपछि बुटवल–पाल्पा सडकखण्ड अवरुद्ध

काठमाडौं । सिद्धार्थ राजमार्ग बुटवल–पाल्पा सडक खण्ड पुनः अवरुद्ध भएको छ । बुटवल–पाल्पा सडकखण्डको हिउँदे खोलामा बनाइएको डाइभर्सनमै पहिरो खसेपछि यातायात आवागमन पुनः अवरुद्ध भएको हो ।

निरन्तरको वर्षाका कारण बुटवल–पाल्पा खण्डको केराबारी नजिक सडक भासिएपछि बिहीवार राति पौने १० बजेबाट डाइभर्सन निर्माण शुरू गरिएको थियो । डाइभर्सन निर्माण सकिएलगत्तै बिहीवार राति २ ठाउँमा पहिरो खसेपछि सवारी आवागमन पूर्णरूपमा ठप्प भएको छ ।

सडक बन्द भएपछि यात्रुहरू अलपत्र परेका छन् । भासिएको सडक निर्माण नभएको र डाइभर्सन बनाइएको सडक समेत हिलाम्य भएकाले ग्राभेल नगर्दासम्म सवारीसाधन पास गर्न सकिने अवस्था नरहेको सडक डिभिजन कार्यालय पाल्पाका सूचना अधिकारी महेश्वर लम्सालले जानकारी दिए ।

अहिले निरन्तर पानी परेकाले पानी रोकिएपछि मात्रै सवारीसाधन सञ्चालन गर्ने गरी काम गरिने उनले बताए । सडक सञ्चालन नहुँदासम्म अन्य वैकल्पिक सडकहरूको प्रयोग गर्न सडक डिभिजन कार्यालय पाल्पाले आग्रह गरेको छ ।