पार्टीको भक्ति गर्ने नेता रहुन्जेल वैज्ञानिक चेतनाको विकास हुन सक्दैनः घनश्याम भुसाल

काठमाडौँ । नेकपा एमालेका नेता घनश्याम भुसालले राजनीतिक दलहरुमा पार्टीको भक्ति गर्ने नेता रहुन्जेल वैज्ञानिक चेतनाको विकास हुन नसक्ने बताएका छन्।

बिहीबार ललितपुरमा आयोजित नेपालमा विज्ञान तथा सूचना प्रविधिसम्बन्धी नीति संवाद कार्यक्रममा बोल्दै उनले यस्तो बताएका हुन्। उनले राम्रो राष्ट्रको परिकल्पना गर्न राम्रो राजनीति चाहिने र त्यो राजनीतिक दलमा रहने भएकोले राजनीतिक दलहरु सुध्रिनुको विकल्प नरहेको उल्लेख गरे।

नेता भुसालले नेपाली कांग्रेसले वि।सं। २०१२ सालतिरको बिपीको प्रजातान्त्रिक वैज्ञानिक समाजवाद, एमालेको समृद्ध नेपाल, सुखी नेपाली, २१ औँ शताब्दीको वैज्ञानिक समाजवाद र एकीकृत समाजवादीको यात्रा समृद्धिको लक्ष्य समाजवादको नारा नारामै सीमित रहेको बताए।

उनले कुनै पनि दलले नारा ल्याए पनि कसरी बनाउने भन्ने योजना पुष्टि गर्न नसकेको बताए। उनले नेपालमा कुनै पनि पार्टीले बनाएर नाराहरु वैज्ञानिक नरहेको दाबी गरे।

उनले भने, ‘राम्रो राष्ट्रको परिकल्पना गर्ने हो भने राम्रो राजनीति चाहियो। राम्रो राजनीति चाहिने हो भने राम्रो पार्टी चाहियो। खराब पार्टीहरु भएको मुलुकको राम्रो भविष्य हुँदैन। राम्रो पार्टी भनेको वैज्ञानिक चेतना भएको पार्टी हो। राजनीतिमा भएका टाठाबाठाको चेतना वैज्ञानिक छैन। हामीलाई पार्टीको भक्ति गर्ने मान्छे पार्टीमा चाहिएको छ, अनि हामी कल्पना गर्छौं वैज्ञानिक चेतनाको। ती मान्छेहरु सत्तामा गएर वैज्ञानिक चेतना आउँछ ? आउँदैन।’