एकीकृत समाजवादीको बैठक आज पनि बस्दै

काठमाडौं । एकीकृत समाजवादीको स्थायी कमिटी बैठक बुधबार पनि जारी रहने भएको छ । बुधबार बिहान ११ बजेदेखि सुरु हुने बैठकमा अध्यक्ष माधव कुमार नेपालले प्रस्तुत गरेको चुनावी समीक्षा प्रतिवेदनमाथि छलफल हुने महासचिव बेदुराम भुसालले जानकारी दिए । 

यसअघि मंगलबारको बैठकमा सातै प्रदेशका इन्चार्जबाट रिपोर्ट  पेश भएको थियो । यसअघिको सचिवालय बैठकले स्थानीय चुनावमा गठबन्धनबाट धोका भएको निष्कर्ष निकाल्दै देशभरबाट विवरण सार्वजनिक गर्ने निर्णय भएको थियो । 

सोही अनुसार मंगलबार अध्यक्ष नेपालको अध्यक्षतामा बसेको बैठकमा  ७ वटै प्रदेशबाट इञ्चार्जहरुले आ–आफ्नो प्रदेशको रिपोर्ट प्रस्तुत गरेका हुन् ।  त्यसरी रिपोर्ट प्रस्तुत गर्नेमा प्रदेश १ बाट घनेन्द्र बस्नेत, मधेस प्रदेशबाट रामचन्द्र यादब, बागमती प्रदेशबाट सावित्रा भुसाल, गण्डकी प्रदेशबाट केशवलाल श्रेष्ठ, लुम्बिनी प्रदेशबाट भागवत विश्वासी, कर्णाली प्रदेशबाट प्रकाश ज्वाला र सुदुरपश्चिम प्रदेशबाट गरिमा शाह गरेकी छन् ।