माओवादी, एकीकृत समाजवादीसहित नौ वाम पार्टीवीच आज औपचारिक एकता घोषणा सभा हुँदै

काठमाडौं । नेपालका ९ वटा कम्युनिष्ट पार्टीका बीचमा आज वृहत कम्युनिष्ट एकताको औपचारिक घोषणा हुँदैछ । नेकपा माओवादी केन्द्र, नेकपा एकीकृत समाजवादीसहितका नौ वाम घटकबीच आज औपचारिक पार्टी एकता घोषणा हुन लागेको हो । 

काठमाडौँको भृकुटीमण्डपमा दिउँसो एक बजे एकता घोषणा सभा राखिएको छ । माओवादी केन्द्र, एकीकृत समाजवादी, नेपाल समाजवादी पार्टी, नेकपा (समाजवादी), जनसमाजवादी पार्टी, नेपाल, नेपाल कम्युनिष्ट पार्टी, नेकपा (माओवादी समाजवादी) र नेकपा (साम्यवादी)सहितका समूह सहभागी हुन लागेका हुन् ।

एकतापछि बन्ने एकीकृत पार्टीको नाम ‘नेपाली कम्युनिष्ट पार्टी’ हुने र चुनाव चिह्न पाँच कुने तारा राख्ने सहमति भएको छ । पार्टीको संयोजक र सहसंयोजक रहनेछन् । संयोजक प्रचण्ड र सहसंयोजक माधव नेपाल रहेर एकता हुन लागेको हो । 

त्यसपछि ६ महिनाभित्र वा यथाशीघ्र महाधिवेशन गर्ने भन्ने विषय उनीहरुका बीचमा सहमति छ । पार्टीको मार्गदर्शक सिद्धान्त भने माक्र्सवाद, लेलिनवाद हुने सहमती छ ।  एकता घोषण सभाअघि भृकुटीमण्डप क्षेत्रमा जनप्रदर्शन गर्ने तयारी छ । सभामा प्रचण्ड, माधव नेपालसहितका नेताले सम्बोधन गर्ने छन् ।