एमसीए-नेपालद्वारा दुई सबस्टेशन र २९७ किलोमिटर प्रसारण लाइन निर्माणको औपचारिक सुरुवात

काठमाडौँ । मिलेनियम च्यालेञ्ज एकाउण्ट नेपाल विकास समिति (एमसीए-नेपाल) ले एमसीसी नेपाल कम्प्याक्ट अन्तर्गत विद्युत् प्रसारण आयोजनाका दुई नयाँ सबस्टेशन तथा २९७ किलोमिटर लामो प्रसारण लाइन निर्माण कार्यको औपचारिक शुभारम्भ गरेको छ।

नुवाकोटमा आयोजित कार्यक्रममा रातमाटे र नयाँ दमौली सबस्टेशनसँगै प्रसारण लाइन विस्तार योजनाको शिलान्यास गरिएको हो। आयोजनामा अमेरिकाबाट प्राप्त ५५ करोड अमेरिकी डलर अनुदान र नेपाल सरकारको १९ करोड ७० लाख अमेरिकी डलर बराबरको लगानी रहेको जनाइएको छ।

कार्यक्रममा नेपाल सरकारका उच्च अधिकारी, एमसीसी र अमेरिकी दूतावासका प्रतिनिधि, विकास साझेदार, निर्माण व्यवसायी तथा स्थानीय समुदायका प्रतिनिधिको सहभागिता रहेको थियो।

एमसीसी नेपाल कम्प्याक्टअन्तर्गत तीनवटा ४०० केभी क्षमताका सबस्टेशन र कुल ३१५ किलोमिटर प्रसारण लाइन निर्माण गर्ने योजना रहेको छ। यसले राष्ट्रिय विद्युत् प्रसारण प्रणालीलाई थप सुदृढ बनाउनुका साथै प्रसारण अवरोध घटाएर घरपरिवार, व्यवसाय तथा उद्योगका लागि विद्युत् आपूर्तिलाई भरपर्दो बनाउने अपेक्षा गरिएको छ। साथै, क्षेत्रीय विद्युत् व्यापारमा नेपालको सहभागिता विस्तार गर्न पनि यसले योगदान पुर्‍याउने विश्वास व्यक्त गरिएको छ।