देशका ६ महानगरमध्ये भरतपुर महानगरको बेरुजु सबैभन्दा कम

चितवन । देशभरका ६ वटा महानगरमध्ये भरतपुर महानगरको बेरुजु सबैभन्दा कम रहेको छ । महालेखा परीक्षकको कार्यालयले २०७६ र ७७ को लेखापरीक्षण प्रतिवेदन सार्वजनिक गर्दै नेपालका छवटा महानगरमध्ये भरतपुर महानगरको बेरूजु प्रतिशत सबैभन्दा कम २.०२ प्रतिशतमात्र रहेको छ । 

भरतपुर महानगर प्रमुख रेनु दाहालले ६ वटा महानगरपालिका मध्ये भरतपुरको बेरुजु सबैभन्दा कम आएको बताइन् । उनले बेरुजु शून्यमा झार्ने लक्ष्यका साथ आफू अगाडि बढेको बताइन्। उनका अनुसार कुल बेरुजुमध्ये आधा भन्दा बढी पेस्की बेरुजु रहेको छ। अन्तिम लेखा परीक्षण हुँदासम्म बेरुजु शुन्यमा झर्ने उनको भनाइ छ । 

महानगरमध्ये सबैभन्दा बढी बेरुजु काठमाडौं महानगरपालिकाको छ । काठमाडौँको ११.८६ प्रतिशत छ । यस्तै वीरगंज महानगरपालिकाको बेरुजु ८.२६ प्रतिशत छ । यसैगरी  पोखरा महानगरपालिकाको बेरुजु ७.४२ प्रतिशत रहेको छ । ललितपुर महानगरपालिकाको बेरुजु ७.२२ प्रतिशत बेरुजु रहेको छ । विराटनगर महानगरपालिकाको बेरुजु ३.४१ प्रतिशत रहेको छ ।