कांग्रेसमा कोइराला परिवारको रस्साकस्सी !

काठमाडौं । नेपाली कांग्रेसको आसन्न १४औं महाधिवेशनको लागि कोइराला परिवारको रस्साकस्सी चलिरहेको छ । संस्थापन इतरको उम्मेदवार टुंगो लाग्न नसकिरहेका बेला तीन कोइरालाबीच कांग्रेस सभापतिको उम्मेदवार को बन्ने भन्ने विषयमा रस्साकस्सी चलिरहेको छ । तीन जनाले सभापतिमा दावेदार गरिरहेका छन् । उनीहरुले सुजाताको निवासमा भएको लञ्च मिटिङमा यस्तो दावी गरेका हुन् । 

कांग्रेसमा पारिवारिक विरासतमा रुपमा लिइने कोइराला परिवारका नेतात्रय महामन्त्री डा शशांक कोइराला, केन्द्रीय सदस्यद्वय डा शेखर कोइराला र सुजाता कोइरालाले सभापतिमा दावेदार गरिरहेका छन् । सभापतिका दाबेदार शशांक र शेखरले आफूलाई सहयोग गर्न एकअर्कासँग आग्रह गरेका छन् । सुजाता कोइरालाले पनि दुई दाजुभाइले आफूले सहयोग गरे सभापतिमा दावी गर्ने बताइरहेकी छन् । 

डा शंशाकले शेरबहादुर देउवालाई हराउन सक्ने आफूमात्र एक्लो उम्मेदवार रहेको बताएका छन् । डा शेखर कोइरालाले आफू १३ औँ महाधिवेसनदेखि नै सभापतिको लागि उम्मेदवार बन्ने गरी वातावरण बनाएको बताए । उनले सुजाता र शंशाकसँग उमेरको कारण पनि यस पटक आफू नै सभापति उठ्नुपर्ने बताए । उनले अर्को महाधिवेसनसम्म आफ्नो उमेर ढल्कने बताएका थिए । 

छलफलमा केन्द्रीय सदस्य सुजाताले भने संस्थापनइतर समूहमा सहमतिमा उम्मेदवार तय गर्नुपर्नेमा जोड दिएकी थिइन् । उनले तेस्रो समूहका नेता पूर्वमहामन्त्री कृष्णप्रसाद सिटौलासँग समेत छलफल गरेर अगाडि बढ्नुपर्ने मत राखेकी छन् । केन्द्रीय सदस्य सुजाताले १४ असारमा बरिष्ठ नेता पौडेल र पूर्वमहामन्त्री सिटौलालाई आफ्नै निवासमा बोलाएर मिलेर महाधिवेशनमा जान आग्रह गरेकी थिइन् । सहभागी एक नेताका अनुसार शशांक र शेखरले सहजै एकअर्कालाई सहयोग गर्ने अवस्था देखिँदैन । सभापतिमा दुबैको दावी रहेको छ ।