जाँदाजाँदै ओलीले भने- एकछिन बादल लागेको छ, फेरि सूर्य उदाउनेछ

काठमाडौं । प्रधानमन्त्रीबाट बिदाई हुँदै गर्दै नेकपा एमालेका अध्यक्ष केपी शर्मा ओलीले फेरि आफू जनताको बीचबाट निर्वाचित भएर प्रधानमन्त्री हुने सङ्केत गरेका छन् ।

ओलीले देशवासीको नाममा आज संवोधन गर्दै भने, ‘एकछिन बादल लागेको हो, फेरि सूर्य उदाउनेछ ।’ ओलीले सम्बोधनको अन्तिममा केही समयका लागि सूर्यलाई बादलले छेके पनि फेरि सूर्य बादल हटाएर उदाउने बताए ।

उनले पार्टीका कार्यकर्ताहरूलाई धैर्य र संयम नगुमाउन र आत्मविश्वास कायम राख्न आग्रह गर्दै भने, ‘हामीलाई बढीमा डेढ वर्ष प्रतिपक्षमा बसाउलान्, त्यसपछि त जनतामा जानैपर्ला, जनताबाट रोक्न कसले सक्छ ?

उनले आफ्नै पार्टीका २३ जना अराजकले सरकार ढाल्न विपक्षीलाई बल पास गरेको भन्दै घृणा व्यक्त गरेका छन् । सर्वोच्च अदालतको राजनीतिक फैसला तत्कालका लागि एमालेविरुद्ध आए पनि यसको प्रभाव भविष्यमा अरुले पनि व्यहोर्नुपर्ने उनले बताए ।