सत्ताको अराजकता सबैतिर फैलिन थाल्यो, चिकित्सक तथा नर्स माथि आक्रमण हुनु जघन्य अपराध :  जनार्दन शर्मा

काठमाडौं । नेकपा माओवादी केन्द्रका नेता जनार्दन शर्माले बाँके स्थित भेरी अस्पतालमा चिकित्सक तथा नर्स माथि भएको आक्रमणलाई जघन्य अपराधको संज्ञा दिएका छन् । 

शुक्रबार बिहान सामाजिक संजालमा घटना प्रति प्रतिक्रिया व्यक्त गर्दै नेता शर्माले महामारीको समयमा अग्रपंक्तिमा खटिएका चिकित्साकर्मीमाथि बारम्बार आक्रमणको घटना भइरहेपनि सरकारले उनीहरूको सुरक्षा प्रति संवेदनशिल नभएको आरोप लगाएका छन् । 

उनले भनेका छन्–“महामारीमा जीवन जोखिममा राखेर सेवा दिइरहेका चिकित्सक, स्वास्थ्यकर्मीहरूमाथि वार्डमै आक्रमण गर्नु जघन्य अपराध हो, उक्त अपराधलाई अस्पताल प्रशासनले टालटुल पार्ने प्रयास झन गम्भीर विषय बनेको छ । दोषीमाथि कारबाही गर्नुका साथै स्वास्थ्यकर्मीको सुरक्षाको ग्यारेन्टीका साथ काम गर्ने वातावरण तयार पारियोस् ।”

उनले टिप्पणी गर्दै भनेका छन्–‘सत्ताको अराजकता सबैतिर फैलिन थालेको छ, म स्वास्थ्यकर्मीको साथमा छु ।’ कोरोना संक्रमितको निधनपछि आक्रोशित आफन्तहरुले हिजो अस्पतालमा कार्यरत, चिकित्सक तथा स्वास्थ्यकर्मीमाथि हातपात गर्दै तोडफोड गरेका थिए ।