जनार्दनसँग एमालेको ०८४ सम्मको तालमेल योजना

काठमाडौं । नेकपा एमालेले जनार्दन शर्माको पार्टी प्रगतिशील लोकतान्त्रिक पार्टी (प्रलोपा) सँग २०८४ को स्थानीय तह तथा प्रदेशसभा चुनावसम्म लक्षित गरेर चुनावी तालमेल योजना बनाएको छ ।

सोही योजना अनुसार आगामी फागुन २१ को प्रतिनिधिसभा चुनावमा रुकुम पूर्व र रुकुम पश्चिम प्रलोपालाई दिएर एमालेले कर्णाली र लुम्बिनीका ११ जिल्लामा प्रलोपाको समर्थन लिने सहमति गरेको छ । 

यो चुनावी तालमेल ०८४ को स्थानीय तह तथा प्रदेश सभा चुनावसम्म कायम राख्ने गरी सहमति भएको एमालेका एक पदाधिकारीले बताए । सहमति पत्रमा एमाले उपाध्यक्ष रामबहादुर थापा (बादल) र प्रलोपाका अध्यक्ष दुर्गा सोबले हस्ताक्षर गरेका छन् ।

सारमा देखाउँदा अहिले फागुन २१ को चुनावको मात्र सहमति देखाएपनि यो २०८४ को स्थानीय तथा प्रदेश सभा चुनावसम्मै कायम गर्ने गरी बनाइएको हो । सहमति अनुसार, रुकुम पश्चिममा प्रलोपा उम्मेदवार जनार्दन शर्मा तथा रुकुम पूर्वमा पनि प्रलोपा उम्मेदवार सन्दीप पुनलाई एमालेले आगामी फागुन २१ को चुनावमा सहयोग गर्नेछ ।

यो सहमति पछि एमालेका दुवै क्षेत्रका उम्मेदवारको उम्मेदवारी कायमै रहेपनि अन्य गतिविधि भने निष्क्रिय बन्ने छ । एमालेले दुवै क्षेत्रका उम्मेदवारलाई २०८४ को प्रदेश सभा चुनावमा प्रलोपाको साथ लिएर जिताउने भन्दै अहिले सहमति मानेर जान सर्कुलर गरेको छ । 

एमालेले रुकुम पूर्वमा लीलामणि गौतम र रुकुम पश्चिममा नन्दराम देवकोटालाई उम्मेदवार बनाएको थियो । अब यी दुवै उम्मेदवारलाई २०८४ मा हुने प्रदेशसभा निर्वाचनमा उम्मेदवार बनाएर प्रलोपाको साथ लिएर चुनाव जिताउने बचन दिइएको छ । नेपाली कम्युनिष्ट पार्टी छोडेर जनार्दनले बाबुराम भट्टराई, सन्तोष परियार लगायतसँग मिलेर प्रलोपा पार्टी गठन गरेका छन् । 

रुकुम पश्चिममा नेपाली कम्युनिष्ट पार्टी (नेकपा)ले गोपाल शर्मा (अनल) र रुकुम पूर्वमा पार्टी संयोजक पुष्पकमल दाहाल (प्रचण्ड) उम्मेदवार छन् । जनार्दनको ध्यान अहिले आफु चुनाव जिते नजिते पनि प्रचण्ड र प्रचण्ड नेतृत्वको पार्टीलाई भने जसरी पनि हराउने योजनामा छन् । त्यही क्रममा उनले आफ्नो क्षेत्र आफु जित्न र प्रचण्ड उठेको क्षेत्रमा प्रचण्डलाई पराजित गराउन मात्रै ध्यान दिएका छन् । त्यसका लागि उनले कर्णाली र लुम्बिनीका ११ जिल्लामा एमाले उम्मेदवारलाई सहयोग गर्ने सहमति गराएका छन् । 

जनार्दनले एमालेसँग चुनावी तालमेल गर्ने विषयमा भने नेकपा सुरु देखि नै प्रष्ट देखिएको थियो । तत्कालिन माओवादीभित्र जनार्दनले विवाद निकालिरहँदा एमाले अध्यक्ष ओलीको योजनामा शर्मा चलेको आरोप उनीमाथी थियो । त्यक्तिमात्रै होइन, दुई साता अगाडी मात्रै शर्मा र ओलीका बीचमा भक्तपुरको गुन्डुमा भएको छलफलमा तालमेलकै बारेमा कुरा भएको र ओलीले सूर्य चिन्ह्रमै उठ्न जनार्दनलाई आग्रह गरेको समाचार सार्वजनिक भएको थियो । 

तर शर्माले त्यसबेला जति खण्डन गरेपनि अहिले चुनावी तालमेलले त्यसलाई पुष्टि गरेको छ । शर्माले नयाँ पार्टी बनाएपनि उनको पक्षमा रुकुम पश्चिममा तत्कालिन माओवादी नेता कार्यकर्ता खास नगएपछि उनले चुनावमा एमालेकै साहारा खोजेका हुन् ।