निर्वाचन क्षेत्रका मतदाताको समस्या बुझ्दै अध्यक्ष प्रचण्ड

चितवन । चितवन राष्ट्रिय निकुन्जबाट अघिल्लो वर्ष मात्रै काटेर ल्याएको खडाईको नयाँ गुन्द्री पिँढीमा ओच्छ्याइएको थियो । भरतपुर महानगर २२ छितामाई क्षेत्रको राप्ती नदी किनारमा सानो टिनले छाएको घरमा आइतबार स्थानीयहरु बडो उत्साही भएर जम्मा भएका देखिन्थे । हस्याङफस्याङ गर्दै घरमुली नागमती बोटेले छिमेकी एक दुई जनालाई साथ लिएर बडो उत्साहका साथ ठुलो डेक्चीमा खाना पकाउँदै थिइन् । नागमतीको घरमा पाहुना हुन माओवादी केन्द्रका अध्यक्ष  एवं पूर्वप्रधानमन्त्री पुष्पकमल दाहाल प्रचण्ड आउन लागेको र त्यही खाना खाने भन्ने खबरले स्थानीय बोटेहरु उत्साही भएर जम्मा भएका थिए ।

शनिबार चितवन आएका प्रचण्डले बोटेको घरमा खाना खाने चाहना गरेपछि उनलाई स्थानीय राजनितिक अगुवाहरुले नागमतीको घरमा खाना खाने प्रबन्ध गरेका थिए । भरतपुर महानगर प्रमुख रेनु दाहाल, २२ का वडा अध्यक्ष बिष्णुराज महतो र स्थानीय अगुवासहित पूर्वप्रधानमन्त्री दाहाल नागमतीको घरमा पुगे । स्थानीय बोटेले फूलमालाले स्वागत गरेपछि पूर्वप्रधानमन्त्री प्रचण्डलाई आफ्ना समस्या सुनाउन थाले ।

निकुन्जमा जाने घास दाउरा गर्ने माछा मार्ने र जीवन चलाउने बाध्यतामा रहेका भरतपुर महानगर राप्ती नदी किनारका बोटे समुदायले आइतबार  दिल खोलेर आफ्ना समस्या माओवादी केन्द्रका अध्यक्ष एवं पूर्वप्रधानमन्त्री प्रचण्डसंग साटासाट गरे ।

पुर्खौंपुर्खादेखि गरी आएको पेशा माछा मार्ने र जीवन चलाउने काममा निकुन्ज प्रशासनले रोकतोक गर्ने र बिनाकारण बोटे समुदायलाई यातना दिने काम निकुन्ज प्रशासनले गरेको भन्दै उनीहरुले आफ्ना समस्या समाधान गरिदिन प्रचण्ड समक्ष आग्रह गरे ।

बिगत ३० वर्षदेखि राप्ती नदी किनारमा गोहीको अण्डा संकलन गर्दै आएका कालु बोटेले निकुन्जले ३ महिना आफूलाई अण्डा संकलन गर्ने काममा लगाउने तर उचित ज्याला नदिने गरेको दुखेसो गरे ।

बोटेहरु वन र वन्यजन्तु संरक्षणमा धेरै सक्रिय र जिम्मेवार रहँदारहँदै पनि निकुन्ज प्रशासनको गलत नजर आफूहरुमा पर्ने गरेको दुखेसो गरे ।

स्थानीय अगुवा मित्रलाल बोटले राप्ती नदी किनारमा बस्ने बोटे समुदायलाई जग्गा धनी पूर्जा उपलब्ध गराइदिनु पर्ने र निर्वाध रुपमा माछा मार्न पाउने वातावरण बनाइदिनु पर्ने माग गरे । निकुन्जमा जानु निउरो, जलुको टिप्ने राप्तीमा माछा मार्ने काम निर्वाध रुपमा गर्न पाउनु पर्ने माग बोटेहरुको थियो । बोटे समुदायको समस्या समाधान गर्ने प्रतिवद्धता जनाउँदै अध्यक्ष प्रचण्डले नागमतीले बुनेको नयाँ खडाईको गुन्द्रीमा पलेटी मारेर चरेसको थालमा सादा खाना खाए ।

पूर्वप्रधानमन्त्री जस्तो मान्छे आफ्नो घरमा आएर दालभात खाएको देख्दा आफूलाई निकै खुसी लागेको नागमती बोटेले बताइन् । यति ठुलो नेता आफ्नो गाउँमा आएर बोटेले पकाएको खाना खाएको देख्दा आफूहरुलाई ज्यादै उत्साह जागेको स्थानीय बोटे अगुवाहरुले बताउँछन् । 

प्रचण्डले पटिहानीमा अम्रेला स्ट्रीट र वडा कार्यालय नजिकै निर्माण भएको कभर्ड हलको निरीक्षण गरेका थिए ।