‘डिजिटल हिंसा नियन्त्रण सरकारको उच्च प्राथमिकतामा’ : मन्त्री सिता वादी

काठमाडौँ । महिला, बालबालिका, लैंगीक तथा यौनिक अल्पसंख्यक र सामाजिक सुरक्षा मन्त्री सिता वादीले प्रविधिको प्रयोगमार्फत हुने लैंगीक हिंसा नियन्त्रण, पीडितको संरक्षण र सुरक्षित डिजिटल वातावरण निर्माणलाई सरकारले उच्च प्राथमिकतामा राखेर काम गरिरहेको बताएकी छन्।

राष्ट्रिय सभामा प्रविधिको प्रयोगबाट हुने लैंगीक हिंसा रोकथामसम्बन्धी संकल्प प्रस्तावमाथिको छलफलमा सरकारका तर्फबाट जवाफ दिँदै मन्त्री वादीले डिजिटल हिंसा आजको गम्भीर सामाजिक तथा कानुनी चुनौती बनेको उल्लेख गरिन्। चालु आर्थिक वर्ष २०८२-८३ मा साइबर बुलिङ, अनलाइन यौन दुर्व्यवहार, नक्कली सामाजिक सञ्जाल खाता, फोटो तथा भिडियो मर्फिङ र घृणाजन्य अभिव्यक्तिलगायत डिजिटल हिंसाका १२ हजार ४१० उजुरी नेपाल प्रहरीमा दर्ता भएको जानकारी उनले दिइन्।

मन्त्री वादीका अनुसार मन्त्रालयले लैङ्गिक हिंसासम्बन्धी विद्यमान कानुनलाई एकीकृत गर्ने तयारी स्वरूप अवधारणा पत्र तयार गरेको छ। प्रस्तावित कानुनमा डिजिटल हिंसा नियन्त्रणलाई मुख्य विषयका रूपमा समावेश गरिएको र उक्त अवधारणा पत्र रायका लागि अर्थ मन्त्रालयमा पठाइएको उनले बताइन्।