जसपामा सत्ता जुहारी : उपेन्द्र - 'हुन्छ हुन्छ', महन्त - 'नाई नाई'

काठमाडौं । खड्ग ओलीलाई विस्थापन गर्न नेपाली काँग्रेस, माओवादी केन्द्र र राष्ट्रिय जनता पार्टी सैद्धान्तिक रुपमा सहमत भएपनि बाह््य प्रभावका कारण काम तमाम हुन सकेको छैन । विशेष गरी राजपा भित्रको पूर्व काँग्रेसी तप्का र राजेन्द्र महत्तोलगायतको समूहलाई भारतीय खुफिया एजेन्सीले खड्ग ओलीसँग मिल्न नै दबाव दिएको बताइन्छ । 

पछिल्ला दिनमा महन्थ ठाकुर सातामा तीनदेखि चार पटक त भारतीय दूतावासमा पुगेर लञ्च मिटिङ नै गर्ने गरेको तथ्य पनि सार्वजनिक भएको छ । राजपा भित्रको बहुमत पक्ष ओलीलाई वर्खास्त गर्न तयार भएपनि महन्थ ठाकुरलगायतको अटेरीका कारण सम्भव हुन सकेको छैन । 

ओलीलाई हटाए तिमीहरुलाई पनि ठिक हुँदैन भन्ने शैलीमा खुफिया एजेन्सी रअका नेपाल प्रमुख तथा भारतको साउथ ब्लकको धम्की महन्थ लगायतलाई दिइएको स्रोतको दावी छ । सोही धम्कीका कारण महन्थले अब प्रधानमन्त्रीको उम्मेदवार म आफै भएको समेत प्रचार गराएका छन् । 

भारतीय खुफिया एजेन्सीका मानिसले पटक पटक नेपाली काँग्रेसका उपसभापति विमलेन्द्र निधि, महन्थ ठाकुर, राजेन्द्र महत्तोसँग भेटवार्ता गरेका छन् । खुफिया एजेन्सीका मान्छेले पूर्व राजावादी जमातसँग पनि बाक्लो भेटवार्ता गर्ने गरेको छ । ओलीलाई केन्द्रमा राखेर पूर्व राजावादी, भारतीय लवीका मान्छेलगायतको साझा मोर्चा बनाउने तयारी गरिएको छ । सो कार्यका लागि भारतीय खुफिया एजेन्सीले भारतीय अति हिन्दुवादी संगठन आरएसएसलाई परिचालन गरेको छ । सो कार्यका लागि योगी आदित्यनाथ समेत परिचालित छन् । 

ओली मार्फत संघीयता, गणतन्त्र, धर्मनिरपेक्षता, समावेशी, मसानुपातिक प्रतिनिधित्व खारेज गराउने, संविधानसभाले बनाएको संविधान डिरेल गर्ने र २०४७ सालको संविधान पुनः स्थापित गराउने साजिस तयार भएको छ । सो कार्यका लागि खुफिया एजेन्सी र राजावादीहरुको खास प्रियपात्रका रुपमा यतिबेला खड्ग ओली परिचालित छन् । गत पुस ५ गते गरिएको प्रतिनिधिसभाको विघटन त्यसैको रिहर्सल थियो । 

गणतन्त्र स्थापनामा कुनै पनि भूमिका नभएका ओलीका कारण सबै परिवर्तनका प्रक्रिया धरापमा परेकाले उनलाई तत्काल नै विस्थापन गर्नुपर्ने अवस्था सिर्जना भएको छ । त्यसकारण राजनीतिमा हरेक दिन नयाँ नयाँ परिदृश्य देखा पर्छ । रात रहे अग्राख समेत पलाउने भएकाले ओलीलाई तत्काल विस्थापन गरेर नयाँ सरकार गठन गरेर जनतालाई राहत दिने कार्यभारबाट राजनीतिक दल किन विमुख भइरहेका छन् भन्ने जिज्ञासा पनि उत्तिकै छ । 

सरकार गठनमा जति दिन ढिलाई हुन्छ, त्यति दिन नै ओलीको ज्यादती बढ्दै जाने भएकाले पनि नयाँ सरकार निर्माणमा विशेष ध्यान दिएर प्रक्रिया शुरु गर्न ढिलाई गर्न नहुने आम नागरिकको चाहना छ । नागरिक समाजले समेत तत्काल नयाँ सरकार गठनमा लाग्न काँग्रेस, माओवादी केन्द्र र राजपाका नेतालाई आग्रह गरेको छ ।

 ओलीले जबरजस्त स्थापना गरेको ओली प्रवृत्ति लोकतन्त्रका लागि नै खतरा भएको उनीहरुको निष्कर्ष छ । ओलीले स्थापना गरेको प्रतिगामी चरित्रलाई पनि सदाका लागि विदा गर्नुपर्ने आवश्यकता छ । गणतन्त्र, संविधासभा निर्माणमा कुनै पनि योगदान नगरेका ओलीलाई ती परिवर्तनको कार्यसूची मन नपर्नु स्वभाविक छ ।

कागलाती जस्तै परेका कारण नेपालको प्रधानमन्त्री बन्ने सौभाग्य पाएका ओलीका कारण नेपाली जनताले हैरानी, परेसानीको कुनै सीमा नै छैन । किनकी, उनको मनमा नै परिवर्तन छैन, त्यसकारण उनले प्रतिगमनको सेवा गरेका छन् । उनले आफूलाई परिवर्तन विरोधी कित्तामा उभ्याएका हुन् ।

जानकारहरुका अनुसार दलहरुबीच एउटा मोटो समझदारी गरेर तत्काल नयाँ सरकार गठनको प्रक्रिया अगाडि बढाउनुपर्छ र छिटो भन्दा छिटो ओलीलाई बालकोट पठाउने प्रबन्ध गर्नुपर्छ । त्यसो गर्न सकिएको खण्डमा मात्रै प्रतिगमनको दुश्चक्रमबाट नेपाल अगाडि जान सक्छ भन्ने विश्लेषकहरुको ठहर छ ।