के छ एमालेको संशोधित विधानमा ?

काठमाडौँ । नेपाल कम्युनिस्ट पार्टी (एमाले) संसदीय दलको नेता प्रतिनिधि सभाका सांसदले मात्रै निर्वाचित गर्ने गरी संसदीय दलको विधान संशोधन गरिएको छ । यसअघि राष्ट्रिय सभाका सांसदले समेत दलको नेता निर्वाचित गर्ने व्यवस्था थियो । 

प्रधानमन्त्री निवास बालुवाटारमा शनिबार बसेको एमाले संसदीय दलको बैठकले संसदीय बोर्डमा २७ सदस्य रहने व्यवस्थालाई संशोधन गरी २९ सदस्यीय बनाउने र एकतिहाई महिला सदस्य अनिवार्य गरेको छ । मुख्य सचेतक विशाल भट्टराईका अनुसार बैठकले नेकपा एमालेको विधान २०७२ मा आवश्यक र समायनुकूल परिमार्जन गरी सङ्घीय संसदीय दलको विधान २०७७ पारित गरेको छ । 

दलको विधान संशोधनका लागि मुख्य सचेतक भट्टराईको संयोजकत्वमा प्रतिनिधि सभा सदस्य शेरबहादुर तामाङ र राष्ट्रिय सभा सदस्य डा. विमला पौडेल राई रहेको विधान संशोधन कमिटी गठन गरिएको थियो । मुख्य सचेतक भट्टराईका अनुसार बैठकमा १० जना सदस्यले मन्तव्य राखेका थिए । गोरखापत्रमा खबर छ ।