‘नेकपा’ नामबारेको विवादको फैसला लम्बियो

काठमाडौं । नेपाल कम्युनिस्ट पार्टी (नेकपा) को नामको आधिकारिकता विवादसम्बन्धी फैसलाको समय लम्बिएको छ। बिहीबारका लागि निर्णय सुनाउने मिति तय भएको थियो । 

तर पूर्वप्रधानन्यायाधीश सुरेन्द्रप्रसाद सिंहको निधनका कारण शोक बिदा परेपछि निर्णय सुनाउने मिति सरेको हो। सर्वोच्च अदालतले अर्को मिति तोकिसकेको छैन। अघिल्लो साता न्यायाधीशद्वय बमकुमार श्रेष्ठ र कुमार रेग्मीको संयुक्त इजलासले बिहीबार निर्णय सुनाउने मिति तोकेको थियो। 

तत्कालीन दुई दल नेकपा एमाले र माओवादी केन्द्रबीच २०७५ जेठमा एकीकरण भएपछि नेकपा गठन भएको थियो। उक्त नाम आफ्नो दलसँग मिलेको भन्दै ऋषि कट्टेलले सर्वोच्चमा रिट दायर गरेका थिए ।  पटक पटक स्थगित भएपछि अघिल्लो साता अन्तिम सुनुवाइ सकिएको थियो। गोरखापत्रमा खबर छ ।