घनश्याम भुसाल र शंकर पोखरेलबीच आकस्मिक भेटघाट, मिल्नुपर्छ भन्नेमा दुबै एकमत

काठमाडौँ । नेकपा प्रचण्ड माधव समूहका स्थायी कमिटी सदस्य तथा पूर्वकृषिमन्त्री घनश्याम भुसाल र नेकपा ओली सूमहका स्थायी कमिटी सदस्य शंकर पोखरेलबीच आज सिंहदरबारमा आकस्मिक भेटघाट भएको छ ।

कानुनी रुपमा विभाजन हुन बाँकी रहेको र राजनीतिक रुपमा विभाजन भइसकेको नेकपाको विवाद समाधान गर्न दुई नेताबीच आकस्मिक भेटघाट भएको स्रोतको भनाइ छ । दोस्रो तहका नेताको रुपमा चिनिएको भुसाल र पोखरेलबीच ४५ मिनेट छलफल भएको थियो । 

लुम्बिनी प्रदेशका मुख्यमन्त्रीसमेत रहेका पोखरेल प्रधानमन्त्री केपी शर्मा ओलीको विश्वासपात्र मानिन्छन् ।  उनी पार्टीमा विवाद देखिरहेको समयमा पार्टीलाई एकताबद्ध बनाउन लकडाउनको समयमा पनि लुम्बिनी प्रदेशबाट पटकपटक बालुवाटार र खुमलटार सबैभन्दा बढी पुग्ने नेताभित्र पर्छन् । अन्ततः उनको पार्टी एकीकरणको प्रयास सफल हुन सकेन । फेरि उनले पार्टी एकताको पक्षमा लबिङ थालेका छन् । स्रोतका अनुसार पार्टीलाई एकढिक्का बनाउन नेता पोख्रेलले घनश्याम भुसाललाई भेटेका हुन् ।  

आज दिउँसो सिंहदरबारस्थित संसदीय दलको कार्यालयमा भएको छलफलमा दुबै नेता पार्टीलाई मिलाउनुपर्छ भन्नेमा नै केन्द्रित भएका थिए । पूर्वमन्त्री भुषालले आफूहरू दुबै जना पार्टी एकताका पक्षमा रहेको र पहिलेदेखि कुराकानी गरिरहेको र आज छलफललाई निरन्तरता दिएके बताए। भुषालले शीर्ष नेताबीच बढेको दुरी साँघुरो नभएको हुनाले त्यसलाई साँघुुरो बनाउन आफू लागिपर्ने बताए । नेता पोखरेलले राजनीतिमा असम्भव भन्ने कुरा नहुने बताए ।