नेकपा (प्रचण्ड–माधव) समुहले किन बोलायो आकस्मिक केन्द्रीय समिति बैठक ?

काठमाडौं । नेकपाको आधिकारिकता विवादमा निर्वाचन आयोगले सरकारको छायाँको रुपमा आदेश पालकको काम गर्न थालेपछि नेकपाको बहुमत पक्ष आज निर्वाचन आयोग जाने तयारी गरेका छन् । त्यसका लागि प्रचण्ड नेपाल समुहले केन्द्रीय समितिको आकस्मिक बैठक बोलाएका छन् ।

बिहान ११ बजे पार्टी कार्यालय पेरिसडाँडामा केन्द्रीय सदस्यहरुलाई नागरिकता सहित अनिवार्य उपस्थितीका लागि बोलाईएको छ । आयोगको गतिविधिबारे समिक्षा गर्दै नेताहरु दिउँसो १ बजे निर्वाचन आयोग जाने तयारी भएको एक केन्द्रीय सदस्यले सफलखबरलाई बताए ।

आयोगले राजनीतिक दल ऐनको दफा ४३ र ४४ मा रहेर आधिकारिकता दाबी गर्दा समेत आयोगले अनेक तानावाना वुन्दै सत्ताको आदेश पालकको रुपमा भूमिका खेलिरहेको छ । निश्पक्ष भएर आयोगले काम गर्नुपर्नेमा त्यसो नगरी आधिकारिकता दिन आनाकानी गरिरहेको छ । आयोगले पुस ५ यता नेकपाका दुवै पक्षका भए गरेका निर्णय लाई नमान्ने, विवाद ३० दिनभित्र उजुरीका रुपमा आउनु पर्नेमा नआएको जस्ता तर्क आयोगले अहिले गर्न थालेको छ ।

प्रधानमन्त्री केपी ओलीले ५ पुसमा प्रतिनिधीसभा विघटन गरेपछि नेकपा राजनीतिक रूपमा विभाजन भएको थियो । तर, दुई महिना बित्दा पनि कानुनी लडाइँ निर्वाचन आयोगले टुंग्याएको छैन् । २० माघमा दुई सय ८७ जना केन्द्रीय सदस्यको हस्ताक्षरसहित पार्टी आधिकारिकताको दाबी गर्दै प्रचण्ड नेपाल पक्ष निर्वाचन आयोग पुगेको थियो ।

आयोग स्यवंले नेकपा केन्द्रीय सदस्य ४४१ सदस्य रहेको र त्यसैलाई मात्र मान्यता दिने बताएको छ । त्यसमध्येको झण्डै ६४ प्रतिशत भन्दा बढी सदस्य प्रचण्ड नेपाल समुहमा छन् । तर पनि प्रचण्ड नेपाल पक्षलाई आयोगले आधिकारिकता दिएको छैन् ।

‘निर्वाचन आयोग संवैधानिक निकाय हो । सरकारले कमजोरी गरे पनि स्वविवेक प्रयोग गरेर त्यसलाई सन्तुलित बनाउने दायित्व ऊसँग हुन्छ, तर यहाँ त आयोगले नै निर्वाचन हुन्छ भनेर पटक–पटक दोहो¥याउने काम गरिरहेको छ  । निर्वाचनका लागि टुंग्याउनुपर्ने विवादमा भने चासो नै दिएको छैन ।’ एक केन्द्रीय सदस्यले भने ।