गृहमन्त्री थापाको कार्ययोजना फेल, अपराध झन् बढ्यो

काठमाडौं । गृह मन्त्रालयको नेतृत्व सम्हालेको करिब एक महिनापछि २०७४ चैत १९ गते आफ्नो ८२ बुँदे गृह प्रशासन सुधारसम्बन्धी कार्ययोजना सार्वजनिक गर्दै मन्त्री रामबहादुर थापा बादलले भनेका थिए, ‘अपराधविरुद्ध शून्य सहनशीलताको नीति अपनाइनेछ ।

अपराधका घटनामा पनि कमी आउने छन् ।’ त्यही कार्यक्रममा उनले जोड दिँदै भनेका थिए, गुन्डागर्दी र अपराध गर्नेलाई कठघरामा ल्याइनेछ । २०७४ फागुन १४ गते गृहमन्त्री बनेका थापाले ‘राष्ट्रिय एकता र जनसेवाका लागि गृह प्रशासन– विकास र समृद्धिका लागि शान्तिसुरक्षा र सुशासन’ नारा दिएर ८२ बुँदे गृह प्रशासन सुधार कार्ययोजना जारी गरेका थिए ।

कार्ययोजनाको ११ नम्बर बुँदामा पनि ‘अपराधविरुद्ध शून्य सहनशीलताको नीति कार्यान्वयन गर्न निर्देशिका तर्जुमा गरी लागू गर्ने’ भनिएको छ । यसको मूल उद्देश्य अपराधका घटनामा कमी ल्याउने थियो ।

थापा गृहमन्त्री भएको ३२ महिना नाघिसकेको छ तर कार्ययोजनामा भनेअनुसार अपराधको ग्राफ घट्नुको सट्टा झनै बढेर गएको छ । खासगरी व्यक्ति हत्या, महिला, बालबालिकाजन्य अपराध र आत्महत्यासम्बन्धी कसुरका घटनाको ‘ग्राफ’ बढेर गएको सातवटै प्रदेशको अपराध तथ्यांकले देखाएको खबर कान्तिपुरमा छापिएको छ ।