भारत र चीन बिच बढेको तनाव मत्थर गर्न ५ बुँदे सहमती

एजेन्सी । भारत र चीन बिच बढ्दै गएको तनाव केही मत्थर भएको छ । दुवै देशको वास्तविक नियन्त्रण रेखा (एलएसी) मा जारी तनाव कम गर्न पाँच बुँदे सहमति भएको छ ।

भारतीय विदेश मन्त्री एस जयशंकर र उनका चिनियाँ समकक्षी वांग यीबीच रुसको मस्कोमा भएको भेटवार्तामा पाँच बुँदे सहमति भएको अन्र्तराष्ट्रिय समाचार संस्थाले जनाएका छन् ।  सीमामा तनाव कम गर्न दुवै देशका विदेशमन्त्रीको बैठकले पाँच बुँदे सहमति गरेपनि के कस्तो सहमती भयो भन्ने विषयमा केही सार्वजनिक गरिएको छैन् । 

बैठकमा भारतका विदेश मन्त्री जयशंकरले एलएसीमा जारी तनाव थप बढाउने पक्षमा भारत नरहेको र चीनसँगको भारत नीतिमा पनि कुनै परिवर्तन नरहेको स्पष्ट पारेको बताईएको छ । चिनियाँ विदेश मन्त्रालयले पनि दुई देश छिमेकी भएको नाताले केही मुद्दामा असहमति हुनु स्वभाविक रहेको तर त्यसलाई सही ढंगले समाधान गरिनुपर्ने पक्षमा चीन रहेको बताएको छ।