बझाङको पहिरोमा ४ जनाको शव भेटियो, ३ जना अझै बेपत्ता

बझाङ । केदारस्युँ गाउँपालिकाको मल्लेसीमा गएको पहिरोमा परेर ४ जनाको मृत्यु भएको छ । शनिबार बिहान गएको पहिरोमा बेपत्ता भएकामध्ये ४ जनाको शव भेटिएको केदारस्युँ गाउँपालिका–८ का वडाध्यक्ष गणेश बोहराले जानकारी दिए । 

अझै ३ जना बेपत्ता भएको र उनीहरुको खोजीकार्य भइरहेको उनले बताए । अन्य बेपत्ताहरु भने सम्पर्कमा आएको प्रहरीले बताएको छ ।

पहिरोमा पुरिएका ४० वर्षीया राममती जेठारा, उनका १२ वर्षीया छोरा प्रयाग जेठाराको शव भेटिएको केदारस्युँ ८, का वडा अध्यक्ष गणेश बोहराले बताए । राममतीकी १६ वर्षकी छोरी अस्मिता जेठारा अफै पहिरोमा बेपत्ता छिन । यस्तै पहिरोमा पुरिएका ८० वर्षका दले जेठारा र १३ वर्षीया सन्तु जेठाराको पनि शव फेला परेको बोहराले जानकारी दिएका छन् । राममती जेठाराकी छोरी अस्मिता, स्थानीय १५ वर्षीया शान्ति जेठारा र २२ वर्षीय गिरी जेठारा पनि पहिरोमा बेपत्ता भएका छन् ।

बेपत्ताको खोजीकार्य जारी रहेको र जिल्लाबाट आएको नेपाल प्रहरी र सशस्त्र प्रहरीको टोली उद्धार कार्यमा सक्रिय रहेको बोहराले बताए । पहिरोले बाटो बगाएका कारण सुरक्षाकर्मीहरुको उद्धार टोली ढिलो गरी त्यहाँ पुगेको हो । उद्धारका लागि हिँडेको नेपाली सेनाको टोली अझै घटनास्थल पुग्न सकिरहेको छैन ।

उद्धारका लागि घटनास्थलतर्फ गएको नेपाली सेनाको गाडी दुर्घटनामा परेको छ । जयपृथ्वी राजमार्ग गाडी असन्तुलित भएर नालीमा खसेकोको र तीन जना सैनिक सामान्य घाइते भएका छन् । घाइते तीनै जना देउरा प्राथमिक स्वास्थ्य केन्द्रमा उपचारपछि ब्यारेक फर्किसकेका छन् । सेनाको अर्को टोली पुनः पठाइएको छ ।

शनिबार बिहान गएको पहिरोले मल्लेसीका १८ वटा घर बगाएको छ भने दुई वटा घरमा क्षति पुगेको छ ।