पोखराको कोरोना विशेष अस्पतालमा एक बिरामीको मृत्यु

पोखरा । पोखरा स्वास्थ्य विज्ञान प्रतिष्ठानमा अवस्थित कोरोना विशेष अस्पतालमा उपचारका क्रममा एक जनाको मृत्यु भएको छ ।

स्याङ्जा फेदीखोला गाउँपालिका ५१ वर्षीय खड्कबहादुर कार्कीको आइतबार साँझ मृत्यु भएको हो ।

२ हप्ताअघि भारतबाट आई क्वारेन्टिनमा बसेर घर फर्किएका बेला कार्कीलाई ज्वरो देखिएको थियो । यद्यपि १४ दिन क्वारेन्टिन बस्नेक्रममा कोरोना परीक्षण गर्दा रिपोर्ट नेगेटिभ आएको थियो । घर फर्किएपछि ज्वरो बढेकाले उनलाई प्रतिष्ठानमा उपचारका लागि ल्याइएको थियो ।

कार्की बेहोस भएको अवस्थामा अस्पतालमा ल्याइएको प्रतिष्ठान निर्देशक डा अर्जुन आचार्यले बताए । कार्कीको शुक्रबारमात्रै कोरोना परीक्षण नतिजा नेगेटिभ आएको थियो ।

उपचारका क्रममा कार्कीको मृत्यु भएपछि प्रतिष्ठान प्रशासनले पुनः कोरोना परीक्षणका लागि स्वाब संकलन गरी प्रयोगशाला पठाएको छ ।