माधव नेपालको सरकारलाई सुझाव : ‘भारतीय सीमामा काँडेतार र पर्खाल लगाऔं’

काठमाडौं । पूर्व प्रधानमन्त्री तथा सत्तारूढ दल नेकपाका वरिष्ठ नेता माधव नेपालले भारतीय सीमामा काँडेतार र पर्खाल लगाउन सरकारलाई सुझाएका छन् ।

महामारीको अवस्था भनेर सरकार भारतीय पक्षले कालापानी, लिपुलेक क्षेत्रका नेपाली भूमिमा सडक निर्माण गर्ने कदममा चुप लागेर बस्न नहुने भन्दै नेपालले आवश्यक पर्दा काँडेतार र सिमामा पर्खाल नै लगाउनु पर्ने धारणा राखेका हुन् । उनले संसदको अन्त«राष्टिय सम्बन्ध समितिको बैठकमा अहिले बिहान आफ्ना धारणा राख्दै सरकारलाई अब त्यसतर्फ पनि सोच्न आग्रह गरेका हुन् ।

भारतीय पक्षबाट नेपालको भूमि अतिक्रमण गर्ने क्रम घरी घरी चलिरहेको र उसले त्यस्तो काम संकटका बेला पारेर गर्ने गरेको भन्दै नेता नेपालले भारतीय सीमामा काँडेतार र पर्खाल लगाउनेसम्म पनि सरकार अगाडि बढ्नुपर्ने बताएका हुन् ।
हिजो मात्रै उनले छुट्टै वक्तब्य जारी गर्दै भिडियो कन्फरेन्समार्फत भएपनि भारतीय पक्षसँग कुटनीतिक सम्वाद गरेर भारतले गरेको अतिक्रमणका विरुद्धमा आवाज उठाउन आग्रह गरेका थिए ।

नेपालले देशको भूमि मिचिएको जस्तो राष्ट्रको सार्वभौम सत्ताजस्तो गम्भीर विषयमा कोरोना महामारी देखाएर सरकार चुप लागेर बस्न नहुने बताउदै सरकार आफनो सार्वभौमसत्ताको रक्षा गर्न सदैव क्रियाशिल भईरहनुपर्ने धारणा राखेका हुन्  । ‘जमिन अतिक्रमण भएको जस्तो गम्भीर विषयमा कोरोना महामारी देखाएर सरकारले भारतसँग वार्ता नगरी बस्न मिल्दैन, भिडियो कन्फरेन्समार्फत नै भएपनि कुरा गर्न सरकार तयार हुनुपर्छ ।

यसमा सरकार सक्रिय भइहाल्न जरुरी छ ।’ नेता नेपालले भने । भूमि व्यवस्था तथा सहकारी मन्त्री पद्मा अर्याललाई पनि नेता नेपालले जथाभावी बोल्दै नहिँड्न सुझाव दिएका छन् । एक अन्तर्वार्तामा मन्त्री अर्यालले नेपालको नक्सामा लिम्पियाधुरा नरहेको बताएको प्रसंग निकाल्दै नेता नेपालले देशको बदनाम गर्ने काम मन्त्रीले गर्ने नहुने बताएका हुन् ।