‘हामीसँग प्रधानमन्त्री ओली डराए’

काठमाडौं । नेकपाका स्थायी समिति सदस्य डा. वेदुराम भुषालले प्रधानमन्त्री आफ्नै पार्टीका नेताहरुसँग निक्कै डराएको बताएका छन् । पार्टी स्थायी समिति बैठक माग गर्ने मध्येका एक भुषालले प्रधानमन्त्रीले तोकिएको स्थायी समिति बैठक आत्तिएर हठात स्थगित गरेको बताए ।

‘उहाँ (प्रधानमन्त्री ओली) बैठकको सामना गर्न पर्छ भनेर डराएकै त होला नि  । अरू त के हुन्छ र ? बैठकबाट भागेर कति दिन भाग्ने हो, कहाँ जाने हो,’ भुषालले सफलखबरसँगको टेलिफोन सम्वादमा भने, ‘बैठकबाट भाग्ने भनेको त पार्टीबाट भाग्ने हो । उहाँले मात्रै हो बैठक सारेको, किनकि उहाँ आफैं सचिवालय बैठक छाडेर हिँड्नुभएको हो ।’

पार्टी बैठकको अध्यक्षता गरेकै ब्यक्ति बैठक छोडेर हिडेपछि अरुलाई दोष देखाएर नहुने भुषालले बताए । उनले प्रधानमन्त्री ओलीले बैठक चलाउनै नसकेको आरोप पनि लगाए । ‘बैठक चलाउन नसक्ने, सचिवालय बैठक छाडेर हिँड्ने, अनि स्थायी समिति बैठक बोलाउन नमान्ने भनेको त बोलाउन नचाहेको भन्दा पनि बैठक चलाउन नसकेको भन्ने हुन्छ,’ भुषालले भने ।