सांसद जनार्दन शर्माको पहलमा रुकुमका स्थानीय तहहरुमा कोरोना विशेष अस्पताल बन्दै

रुकुम पश्चिम । रुकुम पश्चिमका तीन स्थानीय तहहरुमा धमाधम कोरोना भाइरस (कोभिड– १९) विशेष अस्पताल निर्माण भइरहेका छन् । 

पूर्वमन्त्री तथा रुकुमका जनप्रतिनिधि जनार्दन शर्माको विशेष पहलमा निर्माण भइरहेका अस्पतालहरुको निर्माण १०/१० दिनमा सम्पन्न गर्ने लक्ष्य राखिएको छ । 

गत चैत २६ गतेदेखि निर्माण शुरु भएको आठबिसकोट नगरपालिकाको अस्पताल लगभग सम्पन्न हुने चरणमा पुगेको छ । उपचारका लागि सबै उपकरण र सुविधा उपलब्ध हुने गरी निर्माण भइरहेको सो अस्पताल श्रम सहकारीद्वारा निर्माण भइरहेको छ । 

६ वटा एटेच बाथरुम सहितका स्टान्डर्ड प्राइभेट रुमसहित १२ बेडको अस्पताल निर्माणका लागि स्वास्थ्य उपकरण बाहेक ६९ लाख ४५ हजार रुपैयाँ लागत अनुमान रहेको नगरपालिकाले जनाएको छ । 

सांसद शर्मासहित नगरपालिकाभित्र सबै जनताले जनश्रमदान गरेको अस्पताल निर्माणका लागि नगरपालिकाले सहयोग पनि जुटाइरहेको छ । 

त्यस्तै चौरजहारी नगरपालिकामा पनि  सबै सुबिधा सहितको आइसोलेसन निर्माण भइरहेको छ । १० दिनमा सक्ने लक्ष्य सहित काम सुरु भएको भवन पनि जनश्रमदानमा निर्माण भइरहेको छ । 

यस्तै रुकुमको मुसिकोट नगरपालिकामा पनि प्रीफ्याब आइसोलेसन भवन निर्माण भइरेको छ । १० दिनमा सक्ने लक्ष्य सहित काम सुरु भएको भवन पनि सबै सुविधाहरु सहितको हुने जनाइएको छ । 

आफ्ना सांसदले नै अस्पताल बनाउन अगुवाइ गरेर निर्माण कार्य शुरु भएपछि स्थानीय तहहरुको आह्वानमा जनता खुसीसाथ जनश्रमदानमा जुटेका छन् । 

निर्माण कार्यमा सहभागीता जनाउन रुकुम पुगेका पूर्वमन्त्री शर्माले स्वास्थ्य सामग्रीका लागि आफूले उपलब्ध गराउने प्रतिवद्धता जनाए । ‘केही आवश्यक सामाग्री नगरपालिका मार्फत उपलब्ध गराएका छौं र थप स्वास्थ्य सामाग्री उपलब्ध गराउने प्रतिवद्धता व्यक्त गर्दछौ’, उनले भने, ‘जनता नै शक्तिका श्रोत हुन् । सबै कुरा जनताबाट सिकौं ।’ 

त्यस्तै पूर्वमन्त्री शर्माले सानीभेरी अस्पताल लगायतका स्वास्थ्यसंस्थामा डाक्टर र स्वास्थ्यकर्मीसँग भेटेर आवश्यक स्वास्थ सामग्री बोकेर रुकुम पुगेका उनले थप स्वास्थ्य सामाग्री उपलब्ध गराउने प्रतिबद्धता गर्दै  उच्च मनोबलका साथ काम गन्र आग्रह गरेका थिए । सांसदको जिल्लामा निरन्तर सम्पर्क, सहयोग र प्रतिवद्धता पछि काम गर्न उत्साह जागेको स्वास्थ्यकर्मीहरुले प्रतिकृया दिएका थिए ।