जलाउँदै गरेको शव प्रहरीले लियो नियन्त्रणमा

वीरगञ्ज । प्रहरीले जलाउँदै गरेको शव नियन्त्रणमा लिएको छ । 

पर्साको बहुदरमाई नगरपालिका-८ रामनगरी टोलकी २५ वर्षीया उर्मिला देवी पण्डितको शव प्रहरीले नियन्त्रणमा लिएको हो । 

इलाका प्रहरी कार्यालय पोखरियाका अनुसार उर्मिलाको हत्या भएको आशंकामा अनुसन्धानका लागि शवसहित मृतकको सासूससुरा, देउरानी र अर्का एक व्यक्ति गरी ४ जनालाई पनि नियन्त्रणमा लिइएको छ ।

उर्मिलाका ससुरा ६० वर्षीय सुरेश पण्डित, सासू ५५ वर्षीया फूलकुमारी देवी र देउरानी २३ वर्षीया मालती देवी र अर्का व्यक्तिलाई प्रहरीले नियन्त्रणमा लिएको हो । मृतक उर्मिलाका श्रीमान वैदेशिक रोजगारीमा छन् ।

प्रहरीले जलेको शरीरको केही भाग संकलन गरेर परीक्षणका लागि पठाएको छ ।