सभामुख सापकोटा र भारतीय राजदूत क्वात्राबीच शिष्टाचार भेट

काठमाडौँ । सभामुख अग्नि सापकोटासँग नवनियुक्त भारतीय राजदूत विनयमोहन क्वात्राले शिष्टाचार भेटवार्ता गरेका छन् । मंगलबार सभामुखको कार्यकक्ष सिंहदरबार नेपालका लागि नवनियुक्त भारतीय राजदूत क्वात्राले सापकोटासँग शिष्टाचार भेटवार्ता गरेका हुन् ।

सभामुखका प्रेस सल्लाहकार श्रीधर न्यौपानेका अनुसार भेटमा दुई देशको सम्बन्धका विषयमा कुराकानी भएको थियो । नेपाल र भारतको सम्बन्ध औपचारिक नभएर प्राकृतिकसम्बन्ध भएकोले सरकार-सरकार, संसद-संसद र जनता-जनताबीचको बहुआयामिक सम्बन्धलाई अझ उचाइमा पुर्‍याउने विषयमा छलफल भएको न्यौपानेले बताए ।

भेटमा सभामुख सापकोटाले भूकम्पपछि भारतले गरेको सहयोग र वर्तमान अवस्थामा कोरोना भाइरसविरुद्ध लड्नका लागि भारतले गरिरहेको सहयोगको प्रशंसा गरेका थिए ।