कटुवा पेस्तोल र गोलीसहित दुई जना पक्राउ

रौतहट । सर्लाही धनकौला गाउँपालिका–६ छोटौल बैरिया टोल बस्ने २६ वर्षीय राजेश राम र सोही ठाउँ बस्ने २१ वर्षीय जयनारायण राम पक्राउ परेका छन् । उनीहरुलाई प्रहरीले सोमबार राति रौतहटबाट हतियारसहित पक्राउ गरेको हो ।

रौतहटको गरुडा प्रहरी कार्यालयबाट खटेको टोलीले दुबैजनालाई गढीमाई नगरपालिका–६ धरमपुरस्थित बागमती पुल नजिकबाट पक्राउ गरिएको हो । सडकबाट आवतजावत गर्ने मोटरसाइकलहरुलाई चेकजाँच गर्ने क्रममा उनीहरु हतियारसहित पक्राउ परेको गरुडा प्रहरी कार्यालयका इन्चार्ज महतोले जानकारी दिए ।

बीआर ३० यू ८३८२ नम्बरको मोटरसाइकल चढेर हतियारसहित दुईजना मानिसहरु आइरहेको विशेष सूचनाको आधारमा गरुडा प्रहरी कार्यालयका इन्चार्ज डीएसपी ज्ञानकुमार महतो नेतृत्वको टोली घेरा हालेर बसेको थियो । चेकजाँचको क्रममा राजेशको साथबाट एकथान कटुवा पेस्तोल र त्यसमा प्रयोग हुने दुई राउण्ड गोली तथा जयनारायणको साथबाट एक राउण्ड गोली बरामद भएको डीएसपी महतोले बताए । पक्राउ परेका दुबैजनालाई गरुडा प्रहरी कार्यालयको हिरासतमा राखेर थप अनुसन्धान भइरहेको प्रहरीले जनाएको छ ।