प्रधानमन्त्री ओली बुवा मोहनप्रसादको आर्शिवाद लिएसंगै मृगौला प्रत्यारोपणका लागि अस्पताल भर्ना

काठमाडौं । प्रधानमन्त्री केपी शर्मा ओली आफ्ना ९० बर्षीय पिता मोहन प्रसादको आशीर्वाद लिएर त्रिवि शिक्षण अस्पतालमा मिर्गौला प्रत्यारोपणका लागि पुगेका छन् ।

प्रधानमन्त्रीको सरकारी निवास बालुवाटारबाट साँझ मृगौला प्रत्यारोपणका लागि त्रिवि शिक्षण अस्पताल प्रस्थान गर्नअघि ओलीलाई बुबा मोहनप्रसादले स्वास्थ्य लाभको कामना गरेका थिए ।

आज र भोलि आवश्यक तयारीपश्चात फागुन २१ गते बुधवार उनको दोस्रोपटक मृगौला प्रत्यारोपण गरिने सल्लाहकार सूर्य थापाले जानकारी दिए । २०६४ साउनमा भारतको एपोलो अस्पतालमा उनको पहिलोपटक प्रत्यारोपण गरिएको थियो ।

नेपालकै अस्पताल, विशेषज्ञ चिकित्सक, उपकरण र उपलब्ध सेवामा विश्वास र भरोसा गरी प्रधानमन्त्रीले स्वदेशमै प्रत्यारोपण गराउन लिएको यस निर्णयले दूरगामी महत्व बोकेको यथार्थ स्पष्ट भएको थापाले बताए । प्रधानमन्त्री ओलीलाई मृगौला प्रत्यारोपन गर्न भारतबाट यस अघि उनलाई प्रत्यारोपन गरेका चिकित्सकको टोली पनि नेपाल आईपुगेको छ ।

नेपाल आएसंगै आज बिहान प्रधानमन्त्रीसंग भारतिय चिकित्सकको टोलीले छलफल समेत गरेका थिए । मृगौला प्रत्यारोपनका लागि ओली आज सोमबार साँझ ६ बजे टिचिंग अस्पताल समेत भर्ना भएका छन् । उनलाई भान्जी पर्नेले मृगौला दिने भएकाले उनी पनि आजै सांझ अस्पताल भर्ना भएका छन् ।

यस अघि ओलीको मृगौला प्रत्यारोपन अमेरिकामा हुने हल्ला चलेको थियो । तर पछिल्लो समय कोरोना भाइरसको संक्रमण ह्वात्तै बढेपछि संक्रमण हुन सक्ने त्रासले ओलीलाई स्वदेशमै मृगौला प्रत्यारोपन गर्न थालिएको श्रोतको दाबी छ ।