भारतको मेघालयमा भएको झड्पमा दुईको मृत्यु, शिलोङ शहरमा कर्फ्यू

एजेन्सी । भारतको मेघालयमा नागरिकता संशोधन कानूनको विरोधमा  भएको प्रदर्शनको क्रममा झडप हुँदा दुईजनाको मृत्यु भएको छ । मेघालयको इस्ट खासी हिल्समा भएको प्रदर्शनको क्रममा झडप भएको हो ।

झडपमा दुईजनाको मृत्यु भएपछि अवस्था थप उग्र एवम् तनावग्रस्त बन्न नदिन भन्दै स्थानीय प्रशासनले शिलोङ्ग शहरमा कर्फ्यू लगाएको छ । यस्तै प्रशासनले इन्टरनेट सेवा पनि बन्द गरेको छ।

शनिबार बिहान शिलोङ्गको बजार क्षेत्रमा खासी छात्र संघ (केएसयू) सदस्य र गैर–आदीवासी समूहबिच झडप भएको हो । सो झडपमा दुईजनाको मृत्यु भएको हो ।

मृत्यु हुनेमा एकजना खासी युनियनका नेता रहेको भारतीय सञ्चारमाध्यमले जनाएका छन् । झडपको क्रममा भएको चक्कु आक्रमणमा कम्तिमा ६ जना घाइते भएका छन् । अवस्था सामान्य बनाउन प्रशासनले व्यापक रुपमा सुरक्षाकर्मी परिचालन गरेका छन् ।