जातीय विभेदविरुद्ध माइतीघरमा प्रदर्शन, न्याय र संरचनागत सुधारको माग

काठमाडौँ । जातीय विभेदका कारण समाजमा देखा परिरहेको संरचनागत असमानता, हिंसात्मक घटनाहरू तथा ऐतिहासिक रूपमा कायम रहँदै आएको उत्पीडनप्रति आपत्ति जनाउँदै काठमाडौँको माइतीघर मण्डलामा विरोध प्रदर्शन गरिएको छ।

जात व्यवस्था उन्मूलन मोर्चा नेपाल अन्तर्गत प्रथम राष्ट्रिय सम्मेलन आयोजक समितिको समन्वयमा आयोजित उक्त प्रदर्शनमा देशका विभिन्न भागबाट आएका प्रभावित समुदायका सदस्य, अधिकारकर्मी तथा नागरिक समाजका प्रतिनिधिहरूको सहभागिता रहेको थियो।

प्रदर्शनलाई सहभागीहरूले सामाजिक न्याय, समानता र मानवअधिकारका सवालसँग जोड्दै प्रतीकात्मक प्रतिरोध दिवसका रूपमा प्रस्तुत गरेका थिए। छ वर्षअघि रुकुम जिल्लाको सोतीमा प्रेम सम्बन्धका कारण भएको भनिएको घटनामा नवराज विकसहित छ जनाको मृत्यु भएको घटनालाई स्मरण गर्दै उक्त दिनलाई प्रतिरोध र न्यायको मागसँग जोडिएको उल्लेख गरिएको थियो।