भारतीय रुपैयाँसहित पक्राउ

पर्सा । पर्साको वीरगञ्ज महानगरपालिका १६ स्थित भन्सार गेटबाट ससस्त्र प्रहरीको टोलीले करीब रु पाँच लाख १७ हजार भारतीय रुपैयाँसहित एक जनालाई पक्राउ गरेको छ ।

पक्राउ पर्नेमा भारतमा घर बताउने २९ वर्षिय सचिन भास्कर छन् ।  सशस्त्र प्रहरी बल नेपाल नम्बर १४ गुल्म हेक्वा पर्साबाट खटिएको एपीएफ टोलीले उनलाई पक्राउ गरेको हो । भास्करले उक्त रकमको श्रोत खुलाउन नसकेपछि उनलाई पक्राउ गरिएको हो ।

पक्राउ परेका भास्करलाई बरामद भारतीय रुपैयाँसहित आवश्यक कारवाहीको लागि राजश्व अनुसन्धान कार्यालय पथलैयामा बुझाइएको छ ।

चोरीपैठारीको सामान बरामद 
यस्तै झापा जिल्लाको मेचीनगर नगरपालिकास्थित जोरसिमल ईलाकाबाट एपीएफ टोलीले करीब चार लाख ३१ हजार रुपैयाँ बराबरको चोरीपैठारीको सामान बरामद गरेको छ ।

भारतबाट अवैध रुपले नेपालतर्फ ल्याउँदै गरेको उल्लेखित मुल्य बराबरको मोटर पार्ट्स, किराना सामान र कोरियन कम्पनीको विभिन्न औषधी सशस्त्र प्रहरी बल, नेपाल नम्बर ८ गुल्म हेक्वा झापाबाट सशस्त्र प्रहरी निरीक्षक दिव्यराज कोईरालाको कमाण्डमा खटिएको एपीएफ टोलीले बरामद गरेको हो ।

बरामद सामान मेची भन्सार कार्यालय काकडभिट्टामा बुझाईएको छ ।