पाँचथर । हत्या गरेर फालिएकी ताप्लेजुङको आठराई त्रिवेणी गाउँपालिका–२, फुलबारीकी १९ बर्षीया मन्दिरा अधिकारीको शव ३१ दिनपछि शुक्रबार भेटिएको छ । मन्दिराको शव पाँचथरको कुम्मायक गाउँपालिका–२, र तेह्रथुमको आठराई गाउँपालिका–७, मा पर्ने तमोर नदीको फाक्चुवा दोभानस्थित सेती बगरमा भेटिएको प्रहरीले जनाएको छ ।
पाँचथरको कुम्मायक–१, सिम्लेका धनबहादुर माझीले माछा मार्ने क्रममा शव देखेपछि प्रहरीलाई खबर गरेका थिए । शव भेटिएको जानकारी पाएपछि त्यहाँ पुगेको इलाका प्रहरी कार्यालय आठराईको टोलिले शव मन्दिराकै भएको पृष्ठि गरेको हो । हातमा रहेको चुराको आधारमा परिवारले शवको पहिचान गरेको इलाका प्रहरी कार्यालय आठराईका प्रहरी निरिक्षक शेसकराम थाम्दारले बताए ।
मन्दिराको गत मंसीर १७ गते आठराई त्रिवेणी गाउँपालिका–३, का दाजु पर्ने २७ बर्षीय रमेश अधिकारीले हत्या गरी तमोर नदीमा फालेका थिए । मन्दिरा मंसीर १७ गते साँझदेखि घरबाट बेपत्ता भएकी थिइन् । उनको सोही रात आठराई त्रिवेणी गाउँपालिका–२, फुलबारी पुछार र नाङ्खोल्याङ्को सेसम्भु जोडने खड्कुडे झोलुङ्गे पुल नजिकै हत्या गरी तमोर नदीमा फालेको रमेशले प्रहरी समक्ष स्वीकारीसकेका छन् ।
मन्दिराको सगोत्री दाजु रमेश तीन बर्ष अघिदेखि फुलबारीकै गुप्तेश्वर माध्यमिक विद्यालयमा शिक्षण गर्दै आएका थिए । निमावि तहका लागि करार शिक्षकको रुपमा काम गर्दै आएका रमेश मन्दिराकै घरमा डेरा बस्दै आएका थिए । सोही क्रममा रमेश र मन्दिराबीच प्रेम झाङ्गिएको अनुसन्धानको क्रममा खुलेको ताप्लेजुङ प्रहरीले जनाएको छ । मन्दिरासँग शारीरिक सम्बन्ध समेत राख्दै आएका रमेशले सोही कुरा बाहिर आउने डरले मन्दिराको हत्या गरेको अनुसन्धानबाट खुलेको हो ।
रमेशलाई प्रहरीले हत्या गरेको २३ दिनपछि पुष नौ गते हाङपाङस्थित घरैबाट पक्राउ गरेको थियो । गत चैत महिनामा दरबन्दी समायोजनपछि रमेश आफ्नै घर हाङपाङ गएका थिए । उनले हाङपाङकै सरस्वती माध्यमिक विद्यालयमा करार शिक्षककै रुपमा काम गर्दै आएका थिए । मन्दिरा हत्याको एक सातापछि, मंसिर २५ गते रमेशको ताप्लेजुङ जिल्लाकै एक युवतीसँग बिवाह समेत भएको छ ।
आफ्नो बिवाहका लागि सामग्री किन्न ताप्लेजुङ सदरमुकाम फुङलिङ गएर फर्किने क्रममा रमेशले मन्दिरालाई फोन गरी भेट्न बोलाएका थिए । भेटपछि बिवाहकै बिषयमा बिवाद हुँदा आवेशमा आई रमेशले मन्दिराको हत्या गरेर तमोर नदीमा फालेको प्रहरी समक्ष बताएका थिए । रमेशले प्रहरी समक्ष मन्दिराको आफैंले हत्या गरेर फालेको बयान दिएपछि ताप्लेजुङ, तेह्रथुम, पाँचथर र धनकुटाका प्रहरीले तमोर नदीमा शवको खोजीकार्य जारी राखेका थिए ।
उनको शव शुक्रबारै भेटिए पनि ताप्लेजुङ फुलबारीबाट उनका आफन्त शव भेटिएको स्थानमा शनिबार मात्र पुगेको प्रहरीले जनाएको छ । उनको शवलाई पोष्टमार्डमका लागि जिल्ला अस्पताल पाँचथर ल्याइएको छ । राजधानी दैनिकमा खबर छ ।
प्रतिक्रिया दिनुहोस
पत्रपत्रिकाबाट
आइतबार, २० पुस २०७६, ०७ : २०
लेखकबाट थप
सम्बन्धित समाचारहरु
बुटवलमा बुवाले गरे आफ्नै १७ वर्षीया छोरीको हत्या
वैदेशिक रोजगारीबाट फर्किएपछि पत्नीको हत्या
खुकुरी प्रहार गरी श्रीमतीको हत्या
बाँकेमा श्रीमानले धारिलो हतियार प्रहार गर्दा श्रीमतीको मृत्यु
खन्तिले हानेर साथीको हत्या
विराटनगरमा हत्या गरेर फालिएको अवस्थामा स्टाफ नर्सको शव भेटियो