उपनिर्वाचन शान्तिपूर्ण : चितवनको ३ वडामा ४७ प्रतिशत मत खस्यो

चितवन । स्थानीय तह उपनिर्वाचन अन्तर्गत चितवनको तीन वटा वडामा शान्तिपूर्ण तरिकाले मतदान जारी छ ।

भरतपुर महानगरपालिका वडा नं १६ र खैरहनी नगरपालिका वडा नं ४ र ५ मा अहिलेसम्म शान्तिपूर्ण रुपमा चुनाव भइरहेको जिल्ला प्रहरी कार्यालय चितवनले जनाएको छ । 

बिहान ७ बजेबाट भएको चुनावमा तिन वटै वडामा मतदाताहरुको उत्साहपूर्ण सहभागिता रहेको छ । मध्यान्ह १२ बजेसम्ममा चितवनका ३ वटा वडामा ६ हजार १ सय ९३ मत खसेको मुख्य निर्वाचन अधिकृतको कार्यालयले जनाएको छ । 

गाविस भवन मोहनपुर मतदान केन्द्रमा ६९८, दुर्गा शेषकान्त अधिकारी मावि विजयनगरमा १५७३, मावि ढड्ढाघारीमा १५१४ मत खसेको छ । यस्तै जनएकता आधारभुत विद्यालय हात्तिलेटमा ९३३, राप्रावि कुनाघीमा ५६९ र राष्ट्रिय आधारभुत विद्यालय सलौली मतदान स्थलमा ९०६ मत खसेको जनाइएको छ ।

भरतपुर १६ मा ८ हजार ४८१ मतदाता रहेका छन भने खैरहनी ४ मा २ हजार ६९२ र वडा नं ५ मा दुई हजार १११ मतदाता रहेका छन् । यसअघिको निर्वाचनमा भरतपुर १६ मा नेकपा, खैरहनी ४ र ५ मा नेपाली काँग्रेस विजयी भएको थियो । तीन वडामा वडाध्यक्षको निधनपछि उपनिर्वाचन भएको हो ।

सम्बन्धित वडामा शुरक्षा व्यवस्था कडा बनाइएको छ । अनुमति पत्र विना कुनै पनि सवारी साधानलाई आवतजावतमा रोक लगाइएको छ ।