काठमाडौं । जबरजस्ती करणी उद्योगमा पुर्पक्षका लागि जेल चलान भएका निवर्तमान सभामुख कृष्णबहादुर महरा यतिबेला डिल्लीबजार कारागारमा छन् ।

उनलाई कारागारको ‘क’ ब्लकमा राखिएको छ । स्रोतका अनुसार महरा  पूर्वआईजीपी रमेशचन्द ठकुरीको ‘रुममेट’ रहेका छन् । ठकुरी सुडान घोटाला काण्डका भ्रष्टाचारको आरोपमा जेल चलान भएका हुन्

करिब एक महिना थापाथलीस्थित नर्भिक अस्पतालमा बिताएका महरालाई सोमबार जिल्ला अदालत काठमाडौंले पुर्पक्षका लागि थुनामा पठाउने आदेश गरेको थियो । त्यसलगत्तै उनलाई डिल्लीबजार लगिएको थियो । 

महरा अब मुद्दाको अन्तिम फैसला नभएसम्म जेलमै बस्नुपर्नेछ या साधारण तारखेमा रिहाइका लागि उच्च अदालत जानुपर्नेछ । उनका कानुन व्यवसायीहरुले  उच्च अदालतमा जाने तयारी गरेका छन् । 

महराले सांसद पदबाट पाउने सबै सेवा सुविधा अब जेल चलानसँगै रोकिएको छ । अब उनले कुनै पनि सुविधा पाउने छैनन् । तर सांसद पद भने उनको खोसिएको छैन । कैदको फैसला नै भएको खण्डमा उनको सांसद पद स्वतः गुम्नेछ ।