वीपी राजमार्गमा बस दुर्घटना, उद्धार कार्य जारी

काभ्रेपलाञ्चोक । बनेपाबाट रोशी गाउँपालिका-६ सुगुरे/चम्पागाउँतर्फ जाँदै गरेको बा ३ ख ८३९८ नम्बरको बस दुर्घटनामा परेको छ।

प्राप्त प्रारम्भिक जानकारी अनुसार बस वीपी राजमार्गअन्तर्गत भकुण्डे नजिक बुद्धकोट डाँडो भन्ने स्थानबाट करिब ३०० मिटर तल खसेको हो। दुर्घटनापछि बस पूर्णरूपमा क्षतिग्रस्त भएको बताइएको छ। दुर्घटनामा परेकाहरूको उद्धार कार्य जारी रहेको छ। घाइतेहरूलाई भिरबाट माथि ल्याउने काम भइरहेको स्थानीय स्रोतले जनाएको छ।

दुर्घटनामा मानवीय क्षतिको विवरण भने अझै एकिन हुन सकेको छैन। मृतक तथा घाइतेको यकिन संख्या आउन बाँकी रहेको र उद्धार तथा खोजी कार्य जारी रहेकाले थप विवरण प्राप्त हुनासाथ सार्वजनिक गरिने जनाइएको छ।

प्रहरी, स्थानीयवासी तथा उद्धारकर्मीहरूको टोली घटनास्थलमा परिचालित रहेको छ। दुर्घटनाको कारणबारे अनुसन्धान भइरहेको प्रहरीले जनाएको छ।