अव्यवस्थित बसोबासीको समस्या समाधानका लागि तथ्यमा आधारित नीति आवश्यक : शंकर पोखरेल

काठमाडौँ । नेकपा (एमाले)का महासचिव शंकर पोखरेलले लालपुर्जा नभएका नागरिकलाई एकमुष्ट हटाउने प्रकारको नीति लागू भए ठुलो संख्यामा नागरिक गरिबीको चक्रमा धकेलिन सक्ने बताएका छन्।

सामाजिक सञ्जालमार्फत धारणा सार्वजनिक गर्दै उनले यस्ता निर्णयले प्रत्यक्ष वा अप्रत्यक्ष रूपमा करिब ५० लाख नागरिक प्रभावित हुन सक्ने उल्लेख गरेका छन्। उनका अनुसार त्यसले राष्ट्रिय अर्थतन्त्र तथा सामाजिक स्थायित्वमा समेत गम्भीर प्रभाव पार्न सक्छ।

पोखरेलले भूमि समस्या समाधानका लागि गठित आयोगमा प्राप्त निवेदनका आधारमा देशभर ९८ हजार ५०२ भूमिहीन सुकुम्वासी, १ लाख ८० हजार २९३ सुकुम्वासी तथा ९ लाख ३० हजार ७९० अव्यवस्थित बसोबासी गरी कुल १२ लाख ९ हजार ५८५ जनाले आवेदन दिएको जानकारी दिएका छन्। साथै, वास्तविक भूमिहीनमध्ये केही अझै अभिलेख बाहिर रहेको अनुमान पनि उनले गरेका छन्।