‘पछिल्ला निर्वाचन परिणामलाई वामपन्थी शक्तिको पराजयका रूपमा व्याख्या गर्नु उपयुक्त हुदैन्’ : शंकर पोखरेल

काठमाडौँ । नेकपा एमालेका महासचिव शंकर पोखरेलले पछिल्ला निर्वाचन परिणामलाई केवल वामपन्थी शक्तिको पराजयका रूपमा व्याख्या गर्नु उपयुक्त नहुने बताएका छन् । उनका अनुसार वर्तमान परिणामले समग्र लोकतान्त्रिक शक्तिहरूको अवस्थामाथि गम्भीर प्रश्न उठाएको छ ।

सामाजिक सञ्जालमार्फत धारणा सार्वजनिक गर्दै उनले भारतको केरल राज्यमा वाम गठबन्धन पराजित भएको घटनासँग नेपालको वाम आन्दोलनलाई जोडेर गरिएका विश्लेषणप्रति असहमति जनाएका हुन् ।

पोखरेलले केरलमा विगतदेखि नै निर्वाचनपिच्छे सत्ता परिवर्तन हुने राजनीतिक प्रवृत्ति देखिँदै आएको उल्लेख गरेका छन् । अघिल्लो निर्वाचनमा भने वाम गठबन्धन पुनः सरकारमा फर्कन सफल भएको उदाहरण दिँदै उनले कुनै एक चुनावी परिणामका आधारमा वाम आन्दोलनको भविष्य निर्धारण गर्न नसकिने धारणा राखेका छन् ।

उनका अनुसार राजनीतिक शक्तिको दीर्घकालीन भविष्य जनतासँगको सम्बन्ध, राष्ट्रहितप्रतिको प्रतिबद्धता तथा भविष्य केन्द्रित नीतिगत एजेन्डाले तय गर्ने विषय हो ।

महासचिव पोखरेलले अहिले देखिएको राजनीतिक पराजयलाई व्यापक लोकतान्त्रिक शक्तिहरूको चुनौतीका रूपमा लिनुपर्ने बताएका छन् । लोकतान्त्रिक आन्दोलनको आधार बनेका राजनीतिक दलहरूले हारका कारणबारे गम्भीर समीक्षा गर्दै पुनर्गठन र पुनर्जागरणको स्पष्ट योजना तयार गर्नुपर्ने आवश्यकता उनले औँल्याएका छन् ।

उनले लोकतान्त्रिक भविष्यलाई सुरक्षित बनाउन राजनीतिक शक्तिहरूले आत्ममुल्यांकनमार्फत संगठनात्मक तथा वैचारिक सुधारतर्फ अग्रसर हुनुपर्ने धारणा पनि व्यक्त गरेका छन् ।