आर्थिक नीतिमा निजी क्षेत्रप्रति नकारात्मक भाष्य परित्याग गर्नुपर्नेमा प्रदीप पौडेलको जोड

काठमाडौँ । नेपाली काँग्रेसका महामन्त्री प्रदीप पौडेलले अर्थतन्त्रमा निजी क्षेत्रको भूमिकालाई अवमूल्यन गर्ने भाष्य अन्त्य हुनुपर्ने बताएका छन्। कानुनको दायराभित्र रहेर व्यवसाय सञ्चालन गर्दै नाफा आर्जन गर्ने अभ्यासलाई नकारात्मक रूपमा व्याख्या गर्नु उपयुक्त नहुने उनको धारणा छ।

नेपाल आर्थिक पत्रकार संघद्वारा काठमाडौँमा आयोजित ‘दलका घोषणापत्रमा आर्थिक एजेन्डा’ विषयक छलफल कार्यक्रममा उनले राजनीतिक दलहरूले निजी क्षेत्रलाई ‘दलाल’को रूपमा चित्रण गर्ने प्रवृत्ति त्याग्नुपर्ने बताए। उनले नीतिगत स्पष्टतासहित निजी लगानीलाई प्रोत्साहन गर्ने वातावरण निर्माण आवश्यक रहेको उल्लेख गरेका छन्।

महामन्त्री पौडेलका अनुसार लामो घोषणापत्र ल्याउने तर कार्यान्वयन कमजोर हुने अभ्यासलाई सुधार गर्दै नेपाली काँग्रेसले सीमित तर कार्यान्वयनयोग्य ‘१० बुँदे घोषणापत्र’ प्रस्तुत गर्ने तयारी गरेको छ। घोषणापत्रमा सम्भावनायुक्त क्षेत्र पहिचान गरी रोजगारी सिर्जना र आर्थिक गतिविधि विस्तार गर्ने स्पष्ट खाका समावेश गरिने उनको भनाइ छ।