बंगलादेशले भारतमै टी-२० विश्वकप खेल्नुपर्ने

एजेन्सी । अन्तर्राष्ट्रिय क्रिकेट परिषद्ले बंगलादेश क्रिकेट बोर्डले माग गरेको टी-२० विश्वकपका खेलस्थल परिवर्तनको प्रस्ताव अस्वीकार गरेको छ।

परिषद्ले विश्वकपको तय भइसकेको तालिकामा कुनै पनि परिवर्तन नहुने स्पष्ट पारेको छ। यो जानकारी समाचार संस्था एसियन न्युज इन्टरनेशनलले सामाजिक सञ्जाल प्लेटफर्म एक्समार्फत परिषद्को उद्धृत गर्दै जनाएको हो।

एसियन न्युज इन्टरनेशनलका अनुसार अन्तर्राष्ट्रिय सुरक्षा विज्ञको मूल्यांकनपछि भारतमा बंगलादेशी टोली र अधिकारीहरूलाई कुनै प्रत्यक्ष खतरा नरहेको निष्कर्ष निकालिएको छ।

विशेषगरी कोलकाता र मुम्बईमा तय भएका खेलहरूमा देखिन सक्ने जोखिमलाई कडा सुरक्षा व्यवस्थाबाट नियन्त्रण गर्न सकिने परिषद्को ठहर छ।

टी-२० विश्वकपबारे अन्तर्राष्ट्रिय क्रिकेट परिषद्

१) तालिका परिवर्तन हुँदैन : परिषद्ले टी-२० विश्वकप २०२६ को खेलतालिका पहिले नै सार्वजनिक भइसकेको जनाएको छ । सहभागी सबै टोलीले नियमअनुसार आफ्ना दायित्व पूरा गर्नुपर्ने जनाएको छ।
२) खतरासम्बन्धी मिडिया रिपोर्ट अस्वीकार : केही मिडिया रिपोर्टले आपतकालीन योजना प्रक्रियालाई वास्तविक खतरा झैँ प्रस्तुत गरेको भन्दै परिषद्ले त्यसलाई अस्वीकार गरेको छ।

सम्भावित अवस्थाका लागि अग्रिम योजना बनाउनु सामान्य र व्यावसायिक अभ्यास भएको परिषद्को भनाइ छ।

३) भारतीय क्रिकेट नियन्त्रण बोर्ड र स्थानीय प्रशासनमाथि भरोसा : भारतको सुरक्षा व्यवस्थाका विषयमा परिषद्ले भारतीय क्रिकेट नियन्त्रण बोर्ड र स्थानीय प्रशासनमाथि पूर्ण विश्वास व्यक्त गरेको छ। ठूला अन्तर्राष्ट्रिय खेल आयोजना सुरक्षित रूपमा सम्पन्न गर्ने भारतको रेकर्ड बलियो रहेको उल्लेख गरिएको छ।

४) टोली चयनमा शर्त नराखिएको : सुरक्षाका कारण खेलाडी छनोट वा हटाउनुपर्ने, दर्शकलाई राष्ट्रिय रङ प्रयोग गर्न रोक्नुपर्ने वा कुनै देशको घरेलु लोकतान्त्रिक प्रक्रियामा हस्तक्षेप गर्नुपर्ने जस्ता कुरा परिषद्ले कहिल्यै नबताएको स्पष्ट गरिएको छ।

५) सुरक्षा व्यवस्था निरन्तर समीक्षा : टी-२० विश्वकप २०२६ को सुरक्षा योजना निरन्तर समीक्षा भइरहेको र यस प्रक्रियामा बंगलादेश क्रिकेट बोर्डसहित सबै सदस्य बोर्डहरूसँग परामर्श भइरहेको परिषद्ले जनाएको छ।

आवश्यक परे थप सुरक्षा सुदृढीकरणका लागि सुझाव र संवादमा परिषद् खुला रहेको पनि बताइएको छ।