इमरान खानका छोराले मागे सरकारसँग बुबा ज्युँदो रहेको प्रमाण

काठमाडौं । पाकिस्तानी जेलमा रहेका पूर्वप्रधानमन्त्री इमरान खानका छोराले सरकारसँग पाकिस्तान तहरीक–ए–इन्साफ पार्टीका संस्थापक इमरान खान जिउँदो रहेको प्रमाण दिन माग गरेका छन् ।

इमरान खानका छोरा कासिम खानले शुक्रबार साँझ एक सामाजिक सञ्जाल पोस्टमार्फत भने, “हामी इमरान खान जिउँदो रहेको प्रमाण माग गरिरहेका छौं ।”

सञ्चार माध्यमहरूमा ७३ वर्षीय पूर्व क्रिकेटरबाट नेता बनेका इमरान खानको जेलभित्र हत्या गरिएको हुनसक्ने आशंका गरिएको अड्कलबाजी फैलिएको छ ।  

इमरान खान एक महिनादेखि उनका परिवारका सदस्य, वकिल र पार्टीका कसैलाई पनि भेट गर्न दिइएको छैन ।उनी धेरै मुद्दामा दुई वर्षभन्दा बढी समयदेखि रावलपिन्डीको जेलमा बन्दी छन् ।

इमरान खानका तीन दिदीबहिनी, पाकिस्तान तहरीक–ए–इन्साफका कार्यकर्ता र खैबर पख्तुनख्वाका मुख्यमन्त्री सोहेल अफ्रिदी पछिल्ला केही दिनदेखि अदियाला जेल बाहिर धर्ना बसेका छन्  । प्रधानमन्त्री शहबाज शरीफ सरकारमाथि परिवारलाई भेट गराउन दबाब दिइरहेका छन् ।

कासिम खानले भने, “मेरा बुवा ८४५ दिनदेखि गिरफ्तारमा छन्। पछिल्ला ६ हप्तादेखि उनलाई एक्लै एउटा ‘डेथ सेल’ मा राखिएको छ । न त कसैलाई उहाँलाई भेट्न दिइएको छ, न कुनै फोन कल, न कुनै सन्देश पठाउन दिइएको छ। उनका दिदीबहिनीलाई हरेकपटक भेट्नबाट रोकिन्छ, जबकि अदालतले स्पष्ट रूपमा भेट्ने अनुमति दिएको छ । कुनै फोन कल छैन, कुनै भेटघाट भएको छैन र जीवनको कुनै प्रमाण प्राप्त भएको छैन । मेरो र मेरो भाइको बुवासँग कुनै सम्पर्क भएको छैन ।”

उनले थप भनेका छन्, “यो पूर्ण रूपमा ब्ल्याकआउट हो । कुनै सुरक्षा प्रोटोकल छैन । यो मेरा बुबाको वास्तविक अवस्था लुकाउने र हाम्रो परिवारलाई जानकारी नदिन खोजिएको नियतपूर्ण प्रयास हो । हामीलाई थाहा छैन उनी सुरक्षित छन् वा छैनन् । पाकिस्तानी सरकार र उनका ह्यान्डलरहरू मेरा बुवाको सुरक्षा तथा यस अमानवीय एकान्तवासका हरेक परिणामका लागि कानुनी, नैतिक तथा अन्तर्राष्ट्रिय रूपमा पूर्ण रूपमा जिम्मेवार हुनुपर्नेछ ।”