१,०५६ सवारी लाइसेन्स सार्वजनिक

काठमाडौ । जेनजी आन्दोलनका क्रममा भएको आगजनी र त्यसपछि उत्पन्न प्राविधिक अवरोध हटेसँगै यातायात व्यवस्था विभागले पहिलो चरणमा छापिएका सवारी चालक अनुमति पत्र (लाइसेन्स) सार्वजनिक गरेको छ। बिहीबार सुरक्षण मुद्रण केन्द्रले छापेका १ हजार ५६ थान लाइसेन्स विभागले सार्वजनिक गरेको हो।

आन्दोलनका बेला अनलाइन प्रणालीमा परेको क्षतिका कारण विभागको पुरानो स्वचालित सूचना प्रणाली अवरुद्ध भएको थियो। सोही कारण लाइसेन्स छपाइबारे आवेदकलाई ७२ घण्टाभित्र पठाइने स्वचालित ‘नोटिफिकेसन’ सेवा हाल सञ्चालनमा छैन।

स्वचालित प्रणाली नचल्दा विभागले छपाइ सम्पन्न भएका लाइसेन्सको सूची आफ्नो आधिकारिक फेसबुक पेजमार्फत सार्वजनिक गर्न थालेको छ।

विभागले फेसबुकमा नाम प्रकाशित भएका आवेदकहरूलाई सक्कल राजस्व तिरेको रसिदसहित विभागमा आएर लाइसेन्स बुझ्न आग्रह गरेको छ।

त्यसैगरी, लाइसेन्स नवीकरण वा नयाँ वर्ग थप गर्ने व्यक्तिहरूले पुरानो सवारी चालक अनुमति पत्र अनिवार्य रूपमा साथमा ल्याउनुपर्ने विभागले जनाएको छ।